Champions League beiseitu Chelsea chak

Chelsea-in season tharah Champions League khelh an tum tih khelmualah an pholang ve leh ta a, an mikhual Tottenham Hotspur chu Enzo Fernandez goal hmangin 1-0 in an hneh - table-ah palina dinhmun an luah mek a, UCL an hnaih zel.

Blues hian hliam vanga an chawlh vang vang hnuah Cole Palmer leh Nicolas Jackson te bul an ṭantir leh thei ta a, player langsar pahnih lo kir hian London club-ah phurna nasa tak a thlen tih a lang - an khel ṭha tlat.

Jackson hian a lo kir lehna inkhelah goal khung theihna remchang a nei nghal a, Micky van de Ven-a ball clear tum chuan Jackson hi perin, goal-ah a shot nghal a, post a per.

Malo Gusto pawhin Blues tan a khung emaw a inti a, Stamford Bridge thawm pawh a ring hman! Mahse, net sir lam zawk a pet fuh. Spurs tan keeper Guglielmo Vicario chet ṭhat zan a ni hlauh a, Jadon Sancho khung ngei tura lang a dante chu pui tak a ni.

Spurs tlarhnunga inkawp Van de Ven leh Cristian Romero tan Jackson a hnawk tluan chhuak zak a, Chelsea coach Enzo Maresca tan mit titlai a tling ang.

Chelsea hian first half-ah erawh goal an khung lo - minute 50-naah Palmer-a'n ball pet thiam bik a nihna pholangin, box chhungah ṭha zetin ball a thlawh lut a, Enzo chuan goal-ah a lo chantir.

Blues tan Moises Caicedo chuan a khung belh zuiah inngai mah se, video assistant referee rawn a nih hnuah offside vangin pawmsak a ni lo a, Spurs tan Pape Matar Sarr chuan si phurh a sut hmanah a inngai bawk.

Mahse, Senegalese midfielder goal khung a pawm hnuah referee Craig Pawson chu khelmual sira VAR monitor en tura tih a ni a, Caicedo laka a foul avangin a thutlukna sut a ni.

Chelsea-in hnehna an chan avangin table-ah palina an ni a, Spurs erawh table-ah 14-na niin, head coach Ange Postecoglou dinhmun a derthawng chhunzawm zel.

London club pahnih hi Pathianni zan dar 6:30-ah an inlan lehnghal dawn a, Blues hian Brentford chu khualmualah lenchilhin, Tottenham hian table mawngphah luahtu Southampton an mikhual dawn thung.