Jamshedpur-in Bagan an hneh!

Indian Super League semifinal first leg-ah a zawnin beisei loh result kan hmu - Bengaluru-in 2-0 a FC Goa an hneh hnuah Jamshedpur chuan 2-1 in Mohun Bagan an hneh ve leh ta a, an ke lehlamin semifinal an rap tawh, tiin a sawi theih.

Khalid Jamil-a enkawl Jamshedpur hi mahni muala khel ni mah se, an squad thlirin team hausa leh player nei ṭha Bagan lakah beiseina a sang lo. Mahse, minute 21-naah Javi Siverio chuan Men of Steel tan goal hmahruai a khung.

Bagan hian Jason Cummings hmangin si phurh an sut zui vat a, mahse, an goal khung theih loh rah an tuar! Goal luh hmain Kolkata club tan Alberto Rodríguez chuan chance nei mah se, crossbar a tauh per.

Liston Colaco che vel hmuhnawm viau mah se, Bagan tan goal a hlawh chhuak thei lo a, Jamshedpur tan pawha lo khel tawh Greg Stewart vanneih zan a ni lo a, Spanish centre back Rodríguez-a'n chance a hlah nawn a, Asish Rai-a'n a hun ṭha neih engmah loah a chantir bawk.

Jamshedpur-in an hun tam zawk tlarhnung lamah hmang mah se, a huntêah an dan pangngaiin an rah leh a, hun pek belhah Ritwik Das chuan mual sir aṭangin penalty box chhungah ball a lir phei a, hei hi ṭha taka tlan lut Javi Hernandez chuan goal-ah a lo chantir.

Bagan tan chhanletna hun a awm tawh lo a, JRD Tata Sports Complex-a mipui 20,000 chuang pungkhawmte thawm chu ring tak a ni - Bagan tan Kolkata khawpuia an inkhelh hun nghah mai chu tihtheih a ni ta a, inkhelah hian JFC leh Bagan fan-te intibuaiin, hliam an awm nual a, hei hian Kolkata-a an inkhelh hun tur a tinghahhlelhawm zual hle.

ISL Semifinal hi Pathianni zanah khelh chhunzawm a ni dawn a, zan dar 7:30-ah FC Goa chuan first leg-a 2-0 a an hneh loh Bengaluru an mikhual ang a, Bagan leh Jamshedpur erawh April 7, Thawhṭanni zanah an intawng leh ang - JFC khelmuala hliam vanga inlan thei lo Lalengmawia Ralte (Apuia) chu inlan thei tawh tura beisei a ni.