La Liga boruak a 'hot' zel

Premier League-ah champion a chiang tiin a sawi ngam a, hetihrual hian league ngaihven hlawh La Liga erawh champion tur a la chiang lo - Barcelona leh Real Madrid ten champion an la beisei ve ve.

Barcelona-in table chung ber luah mekin, anmahni hnaih bertu Real Madrid aia an sanna erawh point thum chauh a ni. A tawi zawnga sawi chuan, match khatin team pahnih inkar a la hril vek thei tihna a ni a, vawi khat chetsual a pawi dawn.

Real Madrid hian zanin dar 7:45-ah tlak hlau Valencia an mikhual dawn a, Barcelona-in zan dar 12:30-ah Real Betis an mikhual dawn thung - inkhel hmuhnawm a beisei ngam ve ve.

Atletico Madrid pawh Pathianni zan dar 7:45-ah an inlan dawn a, Sevilla an lenchilh ang - Atletico hi table-ah pathumna an ni mek a, an league match hnuhnung pathumah an chak zawh loh avangin Barca chu point kua ngawtin an thlau tawh.

Real beiseina

Tun hnaiah Real an inkhel chau hle - Thawhlehni zan khan Real hian Copa del Rey semifinal hautak zet an khel a, zaninah Valencia hmachhawn zuiin, April 9, Thawhlehni zanah Champions League match khel turin Arsenal an lenchilh zui dawn bawk.

Coach Carlo Ancelotti tan thiam taka player siksawi a ṭul dawn tihna a ni a, indim a ṭul khawp ang. Real tan goalkeeper Thibaut Courtois a inhliam mek a, Gunners laka a in fit hman theih nan a aiah Andriy Lunin chu zaninah a luh a rinawm.

Hetihlai hian tlarhmaah pawh Vinicius Jr, Kylian Mbappe leh Rodrygo te a ruala luhtir nghal vek a fuh lo thei a, La Liga-ah champion thei an la nih avangin UCL aia ngaih pawimawh loh ngawt lah a fuh dawn lo - Ancelotti-a 'thluak' fiahin a awm dawn.

Hriat tel ngai chu, Valencia hi an tawh a khirh dawn. Tun season-a table mawngphah lama awm laite pawh nei zak zak team hian relegation zone tlansan zel an duh dawn a, tuna an hlatna hi point li chauh a la nih avangin match apiang thih tha nena hmachhawn zel a ṭul tawh.

Hei le Barca

Real ai maha inkhel chau chu Barcelona an ni - Nilaini zan khan Copa del Rey semifinal-ah tho an inlan a, zaninah league match an khel zui dawn. Hei mai a ni lo, UCL match an khel zui ve dawn bawk a, an vanneihna erawh Real angin khualmualah an zin ve dawn lo.

Catalan club hian UCL quarterfinal-ah Borussia Dortmund an mikhual dawn a, an hahdam hret dawn tihna a ni. Chutihrual chuan zanin dar 12:30-a an hmachhawn tur team Real Betis hi an phur vanglai tak a ni a, Barca champion kalkawnga hnawksak lo siam hi an châk dawn.

Betis hian league match ruk chhung chu a zawnin hnehna an chang tawh a, Manchester United aṭanga loan-a an hawh Antony hian match 12-ah goal li khungin, assist vawi li a nei tawh - zaninah pawh mipui mit fukna a ni dawn.

Hetihrual hian player chhuanvawr Isco chuan hrem vangin Catalan club a hmachhawn thei dawn lo a, a hmun ruak luah tura Giovani Lo Celso a awm tho avangin buai lutukna tur erawh a ni lo.

Yamal a hliam

Barcelona tan player pawimawh Lamine Yamal inlan theih dawn leh dawn loh a la chiang lo a, kum 17 mi forward hi Copa del Rey semifinal-ah khan a inhliam a, lakchhuah a ngai hial.

Coach Hansi Flick tan rawlthar duhawm hi Betis lakah 'risk' lakpui ai chuan, Dortmund hmachhawn thei tura hahdamna hun lo pek mai chu a fuh zawk mai thei. Hetihlai hian Dani Olmo a inlan thei dawn lo bawk.

Barca a pan hnua hliam nei ngun tak Olmo hi kar hmasaa Osasuna nen an inkhelh khan a inhliam a, lakchhuah a ni. Barca lam sum dinhmun ṭhat loh vangin Olmo hian buaina neuh neuh a nei reng bawk a, tun hnai khan Pau Victor nen, La Liga thuneitute chuan Barca sum dinhmun vanga an inkhelh chhunzawm a rem loh thu an sawi.

Mahse, Spain infiamnaa thuneitu sang ber National Sports Council (CSD) chuan player pahnih hi Barca tan an inlan theih tur thu an sawi a, La Liga-in ngaihtuah ṭhat tura thlen an tum! Heng buaina zawng zawng nghilh hian zaninah Barca chak an tum ang.