PVL khel tur Hunthar leh Anastasia

Mizoram Volleyball Association (MVA) hnuaia inelna lian ber Pro Volleyball League khel turin Hunthar leh Anastasia Electric Veng te an tling a, team paruk an kim ta chiah a ni.

Pro Division team pahnih - Chhinga Veng Spikers leh Durtlang North ten MVA Cup an khel lo a, hei vang hian PVL an khel thei lo, hmun ruak pahnih awm chu playoff hmanga hnawhkhah niin Hunthar leh Anastasia te hi an tling.

Team pathumin hmun ruak pahnih an inchuh a, Nilaini khan set thum set khatin Hunthar lakah Anastasia an chak tawh a, Ninganiaah Tuaikual Indoor Stadium, Aizawlah set thum la tlang nghalin 25-8,25-11,25-13-in Dinthar an hneh a ni.

Pro Volleyball hmasa ber 2015-16 champion Anastasia hian inrelbawlna lamah harsatna an tawh avangin 2016-2017-ah club an tinung zui lo. 2018-19 khan Pro Volleyball-ah kir lehin an thleng sang lo a, tun tum playoff-ah an elpui team pahnih hneh ve vein Mizoram inelna sang berah an tel leh ang.

Dintharin a hmain set thum set khatin Hunthar an hneh lo va, tlang thei turin Electric Veng team lakah set hloh lova chak an mamawh laiin, a vawi khat nan Pro Volleyball khelh an tumna an puitlin zo ta lo a ni.

Huntharin title humhim turin hun ṭha an nei thei dawn ve thung a, Dinthar an chak loh rualin Pro Volleyball-a tel turin an tling. Season liam ta khan Huntharin final-ah Tuichangral an hneh a, a vawi thum nan Mizoram volleyball inelna sang berah an champion a, tun season-ah club-in harsatna a tawh avangin division sang ber aṭangin an inhnukdawk a ni.

MVA Cup champion Thutak Nunpuitu Team, MVA Invitation Cup champion Tuichangral, Khawbel leh Sihphir bakah playoff aṭanga tling Anastasia leh Huntharin 2024-25 Pro Volleyball title an inchuh dawn a ni.