Tlawm loin PSG champion dawn?

Paris Saint-Germain chuan midang te la tih theih ve ngai loh an ti thei dawn ta niin a lang, zanin dar 8:30 hian Angers an mikhual dawn, point khat chauh pawh an hmuh belh a nih chuan Ligue 1 champion an ni ang.

Luis Enrique naute hian tun season Ligue 1 match 27 an khelh tawh chinah tlawm an la nei miah lo, zaninah an tlawm lo a nih chuan hneh loh tawng loa French champion ni thei hmasa ber an ni dawn, an nih ngei pawh a rinawm ta hle a ni.

Arab sum hmanga siam len an nih hnuah PSG hian France ram football an thunun hneh hle, kuminah hian an champion leh a nih chuan kum 13 chhunga vawi 11 an champion tlinna tur a ni a, anmahni khelmualah ngei a nih dawn avangin beisei pawh an nei sang zual ang.

Paris club hian an duh ber erawh Champions League title a ni a, kar leh maiah Aston Villa nen quaterfinal an khel dawn. English club an hmachhawn tur hre reng chungin Enrique-a'n a naute a remkhawm a rinawm a, champion theihna tur tawk chuan an inrem ang tih a sawi ngam.

Anmahni hnaih bertu Marseille lakah PSG hian point 21-in hma an hruai fal mek, league match khelh hmabak hi pasarih lai la awm mah se an dinhmun a fal tawh em avangin midang tan umphak theih tawh loha chhal ngam an ni.