Mikel Arteta a lungawi lo

Arsenal manager Mikel Arteta chuan Everton laka an goal chhuah dan chu pawm thiam harsa a ti hle a, vawi 15 tehmeuh a ennawn hnuah pawh penalty a ni thei lo niin a sawi.

Inrinni zan tirah khan Gunners hian Premier League match khel turin Goodison Park an tlawh a, 1-1 a inhnehtawkin point khat ve ve in an insem - North London club tan EPL nomawi beiseina a zuih zual ta hle.

Arsenal tana Leandro Trossard goal khung chu mualneitu lamin Iliman Ndiaye-a penalty hmangin an sut. Myles Lewis-Skelly-a'n Jack Harrison a tih tluk vangin referee Darren England chuan penalty a pe a ni.

Arteta chuan, "Ka lungawi lo tak zet a, pawm thiam theih pawh a ni lo. Inkhel kan thunun a, chak phu pawhin kan khel. Mahse, thil thleng pakhat vangin kan tuar, vawi 15 ngawt ka ennawn a, ka hmuh dan chuan penalty tur a ni lo," tiin a sawi.

Everton manager David Moyes erawhin ngaihdan dang a nei. Moyes chuan, "Kei chuan ka ennawn lo a, thil thleng kha hnung lam aṭangin ka hmu lo bawk, chuvangin penalty a ni nge ni lo ka sawi thei lo," a ti.

Arsenal hian tun season atan chuan Champions League chauh beisei an nei tawh anga sawi theih a ni. Thawhlehni zan hian quarterfinal khel turin Real Madrid an mikhual dawn a, Spanish club lian hmachhawn turin an inbuatsaih chhunzawm nghal ang.