Verstappen a chak ve ta

Formula 1 season kal laiah intlansiak vawi thum a awm tawh a, champion lai Max Verstappen chuan a vawi khat nan hnehna a chang. Nimina tlan zawh tak Japanese Grand Prix-ah a chungnung ber a ni.

Suzuka Circuit hi Verstappen tan hmun nuam a ni, tun hnai season li chhung chu Japan ramah hian a chak vek; tun season driver chmpionship lamah pawh a dinhmun siamṭha chho leh nghalin, hmahruaitu Lando Norris a phak lohna chu point khat chauh a ni leh ta.

Dutch tlangval Verstappen chuan, "Duhthusam a ṭhain kum bul ṭan lo mah ila, tunah chuan kan team tan kawng a inhawng tih a takin kan hmu ve leh ta," tiin a sawi. Tun hmain Sebastian Vettel chuan Suzuka-ah hian vawi li lai hnehna a lo chang ve tawh bawk a ni.

Khawvela car intlansiakna sang ber hian kar khat bak chawlh an nei dawn lo. April 13, Pathianni zan hian Bahrain International Circuit-ah Bahrain Grand Prix an tlan chhunzawm leh nghal ang.