MBA Inter Club Championship zo

Yonex-Sunrise Pooya's Locker MBA Inter Club Badminton Championship 2025 chu April 4, Zirtawpni khan neih zawh a ni ta a, Saron Veng Badminton Club (SBC) chu inelnaah hian a che ṭha ber niin, a pumpui champion trophy an dawng.

March 30 aṭang khan inelna hi neih ṭan niin, team inelnaa kalpui a ni a, category kuaah an inel. Mizoram Badminton Association hnuaia district badminton association pariat aṭangin team 54-in inelna an hmachhawn a ni.

Mizoram Badminton Centre, Zuangtuiah inelna hi neih niin, champion team Saron Veng BC hian 55+ Men's team leh Under-15 Girl's team-ah te champion nomawi an chawi a, U19 Girl's team-ah silver medal dawngin, a pumpuiah tluktu an tawng lo.

Chanmari Shuttlers Club, Chaltlang Badminton Club leh Mizoram Police Badminton Club-te chuan gold medal pahnih ṭheuh an la a, Ralte Villa Badminton Club leh New Serchhip Badminton Club-te chuan silver medal pathum ve ve an hawn bawk.

Sihphir Badminton Club (SPBC) chu Category ngaihhlut hlawh ber, Men's team champion niin, final-ah New Serchhip Badminton Club (NSBC) chu 3-1 in an hneh.