Real tlawm zanah Barca chak bik lo

Inrinni zan khan Real Madrid chuan La Liga-ah 2-1 in Valencia an ngam lo a, hmahruaitu Barcelona-in an inkar tihzauna remchang tak nei mah se, chhawr thei bik loin, Real Betis chu 1-1 in an inhnehtawkpui.

Santiago Bernabeu-a inkhelah beisei loh zawk Valencia-in goal hmahruai an khung a, Mouctar Diakhaby chuan minute 15-na lekah Bernabeu-a ngawihtir - minute 50-naah Vinícius chuan si phurh a sut.

Team pahnih hi 1-1 in an ṭin mai dawn niin a lang hman a, hun pek belh minute nganaah Hugo Duro chuan chakna goal a khung zui - Real tan chhanletna hun a awm tawh lo.

Real Madrid chak loh thu hre sain Barcelona an inlan a, mahse, an hmelma kumhlun chak loh hi an chhawr ṭangkai thei lo - an mikhual Real Betis nen 1-1 in an inhnehtawk.

Catalan club tan Gavi chuan minute sarihna lekah goal hmahruai khung mah se, Real Betis-in minute 17-naah Natan hmangin an chhanglet a, hun tawp thlenga goal dang awm tawh loin, 1-1 in an inhnehtawk - Real nena an inkarah point li a awm mek.

Real hian Thawhlehni zanah Champions League quarterfinal khel turin Barcelona an lenchilh zui dawn a, Nilaini zanah Barcelona-in Borussia Dortmund an mikhual thung ang.