Engzat chiah nge Premier League club ten an hloh dawn?
Coronavirus hri leng vangin khawvel a reh ṭhuap a, chanchinthar luahtu pawh hri leng kai thar leh thi zat chanchin a ni a, khawvelin khaw dang a hawi thei lo.
Chutiang boruak karah chuan sumdawnna a tlachhia a, inhlawh theih a ni lo a, mi tam takin hna an chan a, eichawp dap ṭhinten tlai ei tur nei loin fai rel bel ruak an thlir a!
Infiamna khawvel pawhin khaw dang a hawi hleithei lo. Mipui sing tel ko khawm ṭhin stadium-te chu an reh ruai a, super star hmuh chaka fan-te kalkhawmna ṭhin training ground pawhin luah lumtu a nei ta lo.
Mizo te ngaihven rawn Premier League pawh tiam chin awm loa chawlh a ni a, season tih tawp hial a ri ta - Premier League chief executive Richard Masters chuan pound tluklehdingawn khat hloh thei dinhmuna an din thu a sawi hial tawh.
Premier League club thuneituten an lu thak lo pui an hiat an hiat a, an sum hloh tur zat an thlir a, mangan loh theih a ni lo!
Daily Mail chanchinbua chief sports news correspondent Nick Harris chuan Premier League club-ten sum an hloh theih dan tur a zirchiang a, a tam a ni ringawt.
Manchester United chu sum hloh hnem ber ni thei dinhmunah an ding mek a, Manchester City leh Liverpool hmabak a êng bik lo - hriat tel tur erawh zirchianna hi a dik tak a ni e, tihna a ni lo.
Premier League ṭhulh 'ta se' tih aṭanga chhut a ni a, an sum hloh tur zat pawh hi an sum che vel zirchiang chunga 'rin thu' hmanga siam a ni ve tho.