FIFA President a fimkhur
Khawvela football thuneitu sang ber FIFA president Gianni Infantino chuan mihring nunna thap ai chuan football chawlh rei chu a pawi loh zawk thu a sawi a, "Match, competition leh league awm miah lo hi nunna pakhat lek chhanhim nan pawh a ṭha a ni," a ti.
European football mai ni loin khawvel hmun hrang hrangah football a chawl ṭhuap a, hetihlai hian Belarus, Burundi, Nicaragua leh Tajikistan-ah te chuan kalpui reng a la ni thung.
Infantino chuan, "Risk lak ai chuan nghah hret mai hi a pawi lo zawk a ni. Kan ngaih pawimawh ber chu hriselna a ni hmasa tur a ni a, khawvel hmun hrang hrang ami te hian hei hi kan thinlungah kan vawng tlat tur a ni," a ti.
FIFA President hian video kaltlangin FIFA hnuaia ram 211-te chu a bia a, mihring nunna dah pawimawh hmasa ber turin football khel ṭhin ramte chu a chah a ni.
Kum 50 mi Infantino chuan, "100% in kan him tawh tih kan chiang a nih loh chuan competition pawh neih chhunzawm ngawt chi a ni lo. Kan zavaiin keimahni chauh ni lo, khawvel ngaihdan kan rawn thiam chuan kan hun liam ta ai khan kan ropui zawk ang tih ka ring a, kan hma hun atan pawh ṭha lehzualin kan inbuatsaih thei dawn a ni," tiin a sawi.
Europe-a top flight football la kalpui awmchhun Belarusian Premier League chuan tun hnaiah football a chawlh ṭhuap avangin ngaihven a hlawh thar hle a, footballer intelkhawm pawl FIFPro chuan BPL kalpui reng a ni hi an lo sawisel tawh.
Kar hmasa khan Belarusian club Dynamo Brest chuan khawvel hmun hrang hrang aṭanga ticket lei theih turin an ruahman a, ticket leite hi stadium chhunga milemah an thlalak dahsak an ni!
Brest hian Nilaini khan Belarusian Cup-ah Shakhtyor Soligorsk chu 2-0 in an hneh a, hetah hian 'virtual ticket' an tih leitu fans 50 bawr vel thlalak chu milim nen inkhel en turin an pho chhuak - ticket leitu fan-te hi United Kingdom, Russia, United Arab Emirates leh Iran ami te an ni hlawm.
Belarusian club hian ticket pakhat hi £20 (Rs. 1,896)-in an hralh a, a leitute hi ticket tak tak leh programme an thawn bakah club dawra 10% discount neih theihna card an pe tel - sum hmuhte hi Covid-19 do nan hman a ni thung ang.