Pogba-a'n inkhelh a châk tawh

Kum 27 mi Pogba hi December 26 hnu khan khelmualah a la inlan leh lo a, season ṭantirh lamah inhliam vangin a inlan thei lo bawk. France international hi tun season Premeir League-ah vawi sarih chauh a inlan a, League Cup-ah vawi khat inlan bawkin Europa League-ah a inlan lo. 

Pogba chuan, "Inkhel turin ka inpeih ṭep. Team zinga training hun ka nghakhlel. Rilru kawi pu tura min ngai an awm a, rilru chhia ka pu ngai lo. A  êng zawngin ka thlir ṭhin. Sawiseltu an awm hian football tuihalna a nasa lehzual a, football ka ngainatzia ka hre chhuak leh ṭhin," tiin a theihna lantir a châk tawh thu a sawi.

French midfielder hian tun season-ah goal a la khung lo a, a awm loh chhungin Manchester United-in result ṭha an nei lo. Hei vang hian Pogba sawiselna hi a ri ring lehzual a, a agent Mino Raiola-a'n ṭawngkam a thlahdah bawk avangin Juventus midfielder hlui chhuak tura ngaitu an tam hle.

January transfer-ah Manchester United-in Bruno Fernandes leh Odion Ighalo an lakluh hnuah result a ṭha chho a, Old Trafford-a inkhel entute an phur leh ta bawk. Khawthlang media-te pawhin Pogba chanchin ṭha lo lam an ziak tlem a, English club chhuahsan tura sawi French midfielder pawh a cham zel a rinawm ta zawk.

Thil awm dan sawifiahin Paul Pogba chuan, "August 31-a Southampton nen kan inkhelh ṭumin ka keah hliam ka tuar. Hun rei tak chhung ka ti lui a, amaherawhchu 'khi' a awm tak avangin khelh luih theih a ni lo. Ka ke an tuam khawng a, December-a Watford leh Newcastle kan hmachhawn ṭumin ka rawn kir a, mah se ngai ka la awh loh avangin zai a ngaih phah. Tunah chuan na ka nei tawh lo a, ka kir vat thei ang," tiin a sawi.

Pogba tan ngai awh turin inpuahchahna hun ṭha a awm a, Covid-19 vanga April 3 thleng Premier League khelh hun sawn pawh April 30-ah pawhsei a ni tawh. Premier League an khel chhunzawm thei dawn em tih hriat a ni lo a, tihtawp a nih chuan French midfielder hian inkhel turin season thar a nghah a ṭul dawn a ni.