PSG tan hna a awlsam

Nilani zan khan Paris St Germain chuan French League Cup semifinal-ah Stade de Reims chu 3-0 a hnehin final an lut. April 4 hian Lille hnehtu Lyon nen Stade de France-ah nomawi an inchuh ang.

Stade Auguste-Delaune-a inkhelah PSG tan hian Marquinhos, Ghislain Konan leh Nianzou Kouassi ten goal khat ṭheuh an khung. Season hmasa khan quarterfinal an paltlang lo a, kuminah erawh champion turin an dinhmun a ṭha ta hle.

Thomas Tuchel-a naute hian Thawhṭanni zan mai khan Lorient chu French Cup-ah an hneh tawh bawk, ni hnih hnu leka match an neih leh avangin player pawh an insiksawi nasa hle. PSG manager Tuchel-a'n a player ṭha ṭhenkhat hahchawlhtir mah se tlarhma lamah Neymar leh Kylian Mbappe te an inlan. Brazilian forward hian goal khung tur vawi hnih a siamsak a, goal khung lo mah se Reims tlarhnung chhaih buaitu hnawk tak an ni.