Sir Kenny-a'n damdawi in chhuahsan
Liverpool legend Sir Kenny Dalglish chu coronavirus vei vangin April 15, Nilaini khan damdawi inah dahluh a ni a, nimin khan damdawi in aṭangin a chhuak.
Kum 69 mi Dalglish hian damlohna nei lo mah se Covid-19 test a nei a, a vei tak si avangin damdawi inah hian dah luh a ni. Celtic leh Scotlang forward hlui hian ngai a awh chhoh tawh avangin in lamah khung hran a ni ang.
Dalglish chuan, "Mi ṭhenkhat chuan ka lansarh avangin min duhsak bikah an ngai thei a, amaherawhchu National Health Service (NHS)-ah damlo zawng zawng duat takin an enkawl vek a ni. A ram pum angin kan vannei ka ti a, hah pawh sawi loa medical mite thawhrimna ka chhuang hle a ni," tiin a sawi.
Scottish League-ah Dalglish hian Celtic vawi li a champion pui a, kum 1977 khan Liverpool a pan. Reds hi player leh manager angin vawi riat a champion pui a, European Cup-ah vawi thum a champion pui bawk. Kum 1989-a Hillsborough chhiatna thlen ṭum khan Reds manager a ni a, FA Cup semifinal-ah mipui innek buai vangin Liverpool fan 96 zet an thi.
Dalglish hmalaknain fans vuinaah club aiawh an tel zel a, mi ṭhahnem tak vuinaah amah ngei a tel zel bawk. Kum 2016 khan chhiatna thlenga tuartu 96 nen Freedom of Liverpol chawimawina pek a ni.