EPL nomawi - lo nghah rih lawk rawh!

Liverpool tan Premier League nomawi chawi turin an hmaah 'flight ticket' chhawpin awm mah se, 'by-road' khera kal an thlang - Pathianni zan khan Reds hian league match-ah Fulham chu 3-1 in an ngam lo a, EPL champion ni chiang tura an kalkawng chu pawhsei hretin a awm.

Reds hian Fulham khelmualah goal an khung hmasa zawk a, yard 25 vela hla aṭangin Alexis Mac Allister chuan a khung. Arne Slot-a naute hi hahdamin an chak dawn niin a lang hman a, mahse, beisei loh thil a thleng.

Fulham tan Ryan Sessegnon chuan Reds goal khung aṭanga minute kuanaah si phurh sutna goal a khung a, Alex Iwobi leh Rodrigo Muniz ten first half hmain an khung belhchhah ve leh bawk!

Craven Cottage-ah chawlhlawk an hman meuh chuan, Fulham hian 3-1 in hma an hruai fel der! Reds tan Luis Diaz chuan minute 72-naah si phurh a sut ṭhen a, goal dang khung zui erawh an harsat - bench aṭanga luhtir Harvey Elliott chuan uiawm takin bar a pet per bawk.

Liverpool-in khualmualah Fulham an ngam lo a, league match 26 hnua an tlawm vawi khatna a ni. Merseyside club tan nomawi hlawhchhuah hun a hla leh ta hret a, beidawn viauna tur erawh a ni lo - hmabak match sarihah vawi li an chak chuan an champion ang.

Reds manager Arne Slot chuan, "Kan goal chhuah pathumte kha in en chuan, ven theih vek niin ka hria. Khatiang anga goal chhuah kha kan nei khat khawp - chuti ni lo se, champion thei dinhmunah kan ding kher lo ang.

"Second half-ah kan nihna ang takin kan khel chhuak ta deuh a, goal thum kan chhuah dan erawh Liverpool nih phung a ni lo," a ti a, a lawm lo hle.

Reds hian West Ham (Anfield), Leicester City (away), Tottenham Hotspur (Anfield), Chelsea (away), Arsenal (Anfield), Brighton & Hove Albion (away) leh Crystal Palace (Anfield) te an la hmachhawn dawn.

Match li chiah chak a ngaih tawh avangin an chak chhoh zel chuan Stamford Bridge-ah an champion thei dawn tihna a ni a, Anfield-a Arsenal an mikhual meuh chuan EPL champion ni chungin an elpui team an lo thleng thei ang.