Bundesliga nge lian zawk Serie A?

Zanin dar 12:30 hian Bayern Munich-in Champions League quarterfinal first leg-ah Inter Milan an mikhual dawn. Bavarians hi Bundesliga hmahruaitu an ni a, Inter hi Serie A hmahruaitu a nih ve bawk avangin league pahnih khaikhinna hun ṭha a ni ang.

German club hian Italian club lakah record an nei ṭha zawk a, vawi kua an inkhelh tawhah vawi nga chakin ṭum khat an inhnehtawk a, Inter hi vawi thum an chak ve tawh bawk. Team pahnih hi an ram league ve vea an chet ṭhat bakah UCL nomawi an chawi ve ve tawh a, an inkhel tawk khawp ang.

Bayern hian Inrinni khan season tawpa Thomas Muller chhuah tur thu an ti chiang a, club legend puala UCL nomawi chawi ngei an tum dawn. Vincent Kompany hote hian nomawi chawi thei turin squad pawh an nei ṭha a, tlarhmaah Harry Kane neiin Michael Olise pawh a rintlak ta hle.

German club tana thu hriat hrehawm erawh Jamal Musiala a inhliam a, an chhawr thei dawn lo. Defeneder pawimawh pahnih Alphonso Davies leh Dayot Upamecano te a inhliam a, Kingsley Coman leh Manuel Neuer te an khel thei dawn em tih a la chiang lo. Hliam ngah vangin Bayern tan hna harsat tur a harsat belh ang.

Inter Milan lamin tlarhmaah Marcus Thuram leh Lautaro Martinez te an inkawp tir thei a, Bayern hrechiangtu Yann Sommer leh Benjamin Pavard te an kawl. Italian club-a khel player-ten tawnhriat an nei ṭha a, coach ṭha Simone Inzaghi-a'n a ho bawk avangin an tawh a khirh khawp ang.