EPL aṭangin Southampton an tla fel

Southampton chuan Premier League record duhawm lo berte zinga mi an siam - English football inelna sang berah hian season hman zawh hmaa tla hma ber record an siam a, match khelh hmabak pariat lai la nei mah se an tla chiang tawh.

Pathianni zan khan Tottenham Hotspur Stadium-ah Saints hi an lenglut a, mualneitu Tottenham lamin 3-1 in an lo hneh. Spurts tan James Maddison-a'n goal hnih a khung bakah Mathys Tel chuan a khung bawk.

Southampton tan hian Mateus Fernandes chuan goal khat a khung ve a, mahse an beiseina chhi nung tur leh EPL khel zel tura inchhanhim nan a tawk zo lo, mittui nen khelmual an chhuahsan a ngai.

Tun season Premier League match 31 an khelh aṭangin Southampton hian point 10 chauh an la hmu, a him china awm Wolves (32 points) an phak thei tawh lo, point hmu tlem ber record pawh siam thei dinhmunah an ding bawk.

English football inelna sang berah hian 2007-08 season khan Derby County chuan point 11 hmuin, season khat chhunga point hmu tlem ber record hi an lo siam tawh a, kuminah Saints hian an hmuh belh tawh lo a nih chuan Derby record hi an khum ang.

Southampton manager Ivan Juric chuan, "Ka tan chuan tawnhriat thar mak leh duhawm lo tak zinga mi a ni. Ka naute hnenah chuan fans chunga lawmthu sawi turin ka chah, hetiang dinhmuna kan din lai pawha min thlawp tlattu an nih avangin ka lawm.

"Tla thei dinhmunah kan ding tih an hria a, season kan hmang ṭha lo em em bawk. Chutiang chung chuan fans lamin min phatsan lo a, a tawp thleng khan an theihtawp takmeuh an chhuah a ni," tiin a sawi.

Croatian manager Ivan Juric hian kum 2024 December 21 aṭang khan Southampton hi a enkawl ṭan a, team talbuai lai enkawl a nih avangin a tan hna a awlsam lo, tun thlengin an tho chhuak thei ta lo a ni.

Juric chuan sawi zawmin, "Kan team-ah hian player naupang tak tak theihna nei sang an tam, mahse tawnhriat neih tlem chu inelna sangah a pawina a lang ṭhin, kan elpui dangte angin tawnhriat kan nei tam tawk lo.

"Keimahni ang bawk hian Leicester City leh Ipswich Town pawhin harsatna an tawk, anni pawhin player naupang ṭha nei mah se tawnhriat an nei tam tawk lo - Premier League khel tur chuan tawnhriat a pawimawh," tiin a sawi.