Atletico-in champion an la tum

Kartawp La Liga inkhelah Barcelona leh Real Madrid an chak zo lo a, Atletico Madrid-in hei hi remchangah lain, hnehna an chang thung - Pathianni zan khan an mikhual Sevilla chu 2-1 in an hneh.

Atletico-in hnehna an chan avangin hmahruaitu Barcelona an thlauhna chu point sarih chauh a ni leh ta a, pahnihna Real chu point thum chauhin an thlau tawh bawk.

Pathianni zanah Barca leh Real chak zawh loh thu hre sain Atletico an inlan a, mahse, Sevilla khelmualah goal an chhuah hmasa! Minute sarina lekah Lucien Agoumé chuan goal hmahruai a khung a, Atletico ṭantute an hawihai.

Mahse, minute 25-naah Atletico hian Julian Alvarez-a penalty hmangin si phurh an sut a, goal dang erawh a lut lawk lo. Team pahnih hi 1-1 in an ṭin mai dawn niin a lang tawh a, mahse, hun pek belhah Pablo Barrios a inlar - kum 21 mi midfielder hian chakna goal a khung.

La Liga match thum zet a zawna an chak zawh tawh loh hnuah Atletico-in hnehna an chang ve leh ta a, nomawi an beisei dawn. Diego Simeone naute hi Champions League round of 16 aṭangin Real Madrid-in an pet chhuak a, Copa del Rey semifinal-ah Barcelona an ngam lo bawk.

Madrid khaw club tan an elpui club pahnih tlanpela La Liga nomawi chawi a châkawm dawn - an chak zel bakah Barca leh Real chetsual an chan tel a la ngai thung.