Auba tan hlawhtlin theihna tur club a ngai - Mounguengui
Gabon Football Association president Pierre Alain Mounguengui chuan tun hnai khan an rama striker hriam ber Pierre-Emerick Aubameyang chungchang a sawi a, hlawhtlinna chang turin club tum sang tak nei leh hmabak nei engah a khelh a ngai niin a sawi.
Auba hian season hmasa khan Premier League-ah goal 22 a khung a, Liverpool hmatawng Sadio Mane leh Mohamed Salah te nen Golden Boot an dawng. Reds hi pahnihna an ni a, Gunners erawh Champions League pawh an khel phak lo.
Gabon international striker hian season kal laiah pawh inelna hrang hrangah goal 20 a khung leh tawh a, a contract neih lai hi 2020-21 season zawh ruala tawp ve mai tawh tur a ni.
Pierre Alain Mounguengui chuan, "Tunah hian Arsenal tan a khel a, nomawi chawi a la nei lo. A lan dan chuan an la champion mai pawhin a rinawm loh.
"Arsenal hian hmathlir leh thil tum lian tak an nei lo chu ka ti hauh lo. Mahse, European football kan thlir a nih chuan club lian dangte ai chuan an boruak hi a sang rih lo zawk," a ti. North London club chhuahsan tura pehhel taka hrilhna a ni.
March thla khan Arsenal manager Mikel Arteta chuan an club chu eng dinhmunah pawh ding se Aubameyang chelh a duh thu a lo sawi tawh a, contract thar duhawm leh hmui zawk an zawrh ngei pawhin a rinawm.
Amaherawhchu, Auba hi kum 30 mi a ni tawh a, hlawhtlinna uma club lian zawk a pan a nih pawhin a mak lo ang. Barcelona leh Inter Milan te chuan an club tana khel turin an lo hnimhnai ve reng nia sawi a awm bawk.
Mounguengui chuan sawi zawmin, "Gabon mite chuan Aubameyang theihna sanzia kan hria, club lian taka hun hmang tur leh mimal chawimawina sang dawng tur pawhin kan duhsak," tiin Arsenal fans tana thu hriat nuam lo tak tur a sawi.
Borussia Dortmund striker hlui hian 2018 January thla khan pound maktaduai 56-in Gunners hi a zawm. Europa League leh League Cup final lut tawh mah se a chak lo zawkah an ṭang ve ve a, nomawi a la chawipui rih lo.