MiMSA inelna lian a hnai leh ta

Mizoram MotorSports Association chuan 31st MiMSA Racing Championship 2025 a buatsaih dawn a, ruahman dan chuan April 10-12 chhung hian Tuirial, Airfield-ah neih tur a ni ang.

MST Motors Ather MiMSA Racing Championship hi kar hmasa khan vai hawn tawh niin; lirthei ke hnih nei inelna hlawm hrang pathum - circuit race, drag race leh motocross bakah ke li nei inelna drag race-ah trophy 48 an inchuh dawn a, team 28 telin lawmman Rs 3,20,000 sem chhuah a ni ang.

February tawp lam khan kum 2025-2027 chhunga Mizoram Motorsports hruaitu tur an thlang a, hruaitu tharten championship an huaihawt hmasak ber tur hian ni thum a awh dawn a ni.

MiMSA president Joseph Lalchhanhima chuan, "Hruaitu kal taten Mizoram Motorsports tan hmasawnna tam tak an hnutchhiah a, tun hi hruaitu thlan tharten hma lakna liantham an neih hmasak ber a nih angin theihtawp chhuahin hmasawnna thar hmuh ngei an inbeisei. Lengpui Sairilzo rama tlankawng siam mek hman hlan an nghakhlel tawh a, kuminah hman theiha peih hman hial beisei a ni," a ti.

Mizorama Ather electric vehicle dealer MST Motors chu championship title sponsor an ni a, Yamaha Thansanga & Sons, LBS Suzuki, CK Hyundai, Monster Energy, Big FM leh Mizoram State Sports Council-in an sponsor bawk a ni.