Kenin hnehin Pegula a champion

Hmeichhe tennis world number 4 Jessica Pegula chuan Sofia Kenin chu 6-3, 7-5 a hnehin Charleston Open nomawi a chawi a, clay court inelna bikah chuan a vawi khat champion-na a ni.

Final kheltu player pahnih hi American nula ve ve an ni a, kum 1990 hnu lamah Charleston Open-a American pahnihin nomawi an inchuh leh vawi khatna a ni; Pegula hian game hmasa berah a khingpui service chhuhsak nghalin dinhmun ṭhaah a ding.

Set hnihnaah Australian Open 2020 champion Kenin a chefuh hmasa zawk ve thung a, 5-1 ngawtin a sang fal hman. Mahse, Pegula hian set point vawi thum a inchhanhim hunah a zawnin game ruk a la a, a phu ang ngeiin a chak.

Pegula chuan, "Hmanni lawk khan Miami Open final-ah Aryna Sabalenka ka hneh lo a, rilru hnual takin ka awm. Hun a inher danglam a, tunah chuan hnehna changtu zawk dinhmunah ka ding ve ta.

"Set hnihna kan khelh lai kha chu a vanduai zawk ka ni leh mai dawn nite khan ka hre hman, amaherawhchu beidawng duh miah lo khan ka bei hram hram a, a tawpah ka dingchang," tiin a sawi.