WTA Rogers Cup an ṭhulh
Hmeichhe tennis thuneitu sang Women's Tennis Association (WTA) hnuaia inelna neih tur WTA Rogers Cup chu Covid-19 vangin kuminah khelh theih a ni dawn lo, a hun sawn ni loin tun season atan ṭhulh fel a ni.
Season hmasa khan WTA Rogers Cup hi Toronto-ah neih a ni a, ruahman lawk dan chuan August 7-16 chhung hian Montreal-ah neih a ni thung ang - an tum ang erawh chuan a theih dawn ta lo.
Mipa inelna ATP Rogers Cup pawh nikum khan Montreal-ah neih a ni a, kuminah chuan Toronto lamah neih tum a ni, hmeichhe inelna nen a hmun an inthlak kual chiah dawn tihna a ni.
WTA thupuangtu chuan, "Inelna kan neih tumna hmunah hian kumin August 31 thleng chu mipui punkhawmna lam chi neih phal a ni lo a, hei vang hian tennis tournament pawh a awm thei dawn lo, nakkumah a hmun ruatsaah hian neih tum a ni ang.
"Keini chuan player leh mipui hriselna hi kan ngaipawimawh a, sorkar hmalakna leh thupek a siam pawh hi harsa ti chung pawha kan pawm thiam a ngai, nakkumah hlim taka inhmuh theih kan besei," tiin a sawi.
Season hmasa WTA Rogers Cup-ah khan Canadian nula Bianca Andreescu a champion, a khingpui Serena Williams chu game li chauh an khel hman tihah hliam vangin a inhnukdawk.