Lautaro Martinez duhtu an tam - agent
Inter Milan striker Lautaro Martinez chu European club lian dangten an ngaihven tih a chiang a, transfer boruak a neih len chhan hi a agent Alberto Yaque-a'n thluak hmang taka a player chungchang a sawi ṭhin vang a ni pakhat.
Yaque-a sawi dan chuan Real Madrid, Barcelona, Chelsea leh Manchester City-te chuan Argentine forward hi lakluh an duh vek a, a khelh dan phung nena thlir chuan Catalan Club lian chu a duhpui thu a sawi bawk.
Kum 22 mi Martinez hian season kal laia inelna hrang hranga match 30 a khelh aṭangin goal 16 a khung. Inter manager Antonio Conte kaihhruaina hnuaiah a khel ṭha tluang rih hle.
Martinez-a agent Alberto Yaque chuan, "Eng nge rawn thleng dawn tih chu ka sawi thei lo. Media-in min ziah dan ṭhenkhat hi chu a dik lo. Chutihrualin Real Madrid, Barcelona, Chelsea leh City aṭang chuan phone call ka dawng.
"Thuthang leng vel a tam a, an club tana khel tura an duh takzet a nih chuan a khelh mekna Inter Milan nen inremna an neih a ngai," a ti. Yahue hian hmanni lawk khan a player hi San Siro-ah a hlim thu a lo sawi tawh.
Barca chungchang an zawhna chhang zuiin, "Sergio Aguero angin theihna a nei sang a, tlarhma lama rinrawl tur ngaihven mek Barca tana khel turin a ṭha tawk. A thatna hi Inter leh Argentina tan a lantir tawh," a ti.