Ancelotti-a'n taksa hrisel zawk neih a beisei

Everton manager hi an ram Italy-ah a awm mek, a khupah hliam tenau a neih bakah an ram hi inkharkhip lai an nih avangin a chhuak vak thei lo - an inah a tawmim rih.

Football inelna hrang hrang an chawlh rih avangin Ancelotti tan a khup hliam tih damna hun ṭha a ni ve thei tho, fitness ṭha zawk neih tumin a taksa a sawizawi reng a ni.

AC Milan, Paris Saint-Germain leh Real Madrid pawh enkawl tawh Ancelotti  chuan, "Chawlh kan neih loh lai kha chuan nitin hna thawh a ngai a, ka khup enkawlna hun pawh ka nei ngai meuh lo.

"Tun hun hi ka khup hliam tih dam felna hun ṭhaah ka ngai mai a, taksa sawizawi bakah TV enna hun pawh a ni ve mai," tiin a sawi.

A hnathawhna England aiin an ram Italy hi hri leng a nasat avangin inkharkhipna pawh khauh zawka kalpui a ni a, mahni ina tawmim mipui ṭhenkhat chuan rilru lamah pawh harsatna an tawk nia sawi a awm.

Italian manager chuan, "Khawvel tan hun ṭha chu a ni lo ngei mai, hri a len miau avangin chhungkua a hun hman theih ni mah se thla a muang lo. A lehlam zawnga thlir erawh chuan lawmna tur pawh a awm ve tho.

"He hun thim hi nakinah chuan a la kiang ngei ang a, chumi hunah chuan tun hma aia ṭha zawkin football pawh kan khelh leh theih ka beisei. Kei ngei pawh hriselna ṭha zawk nen team enkawl theih ka inring," a ti.