Kan intum leh dawn alawm, in lo thlir dawn nia - Mala Dinthar-in I League club an ngam
Mizoram club zinga I League khel thei awm chhun Aizawl FC chu Ningani zan khan MPL5 table mawngphaha awm Dinthar FC-in an chelh a, goal awm loin an inhnehtawk.
MPL champion hmasa ber Dinthar FC hian Aizawl FC hi MPL bikah vawi kua hmachhawn tawhin vawi li an hneh a, I League club erawh vawi khat chiah an chak thung.
Hei chauh hi a ni lo, I Day Football 2014 final-ah Dinthar FC hian K. Malsawmkima enkawl Aizawl FC chu an lo hneh tawh bawk. Kumin hi Dinthar FC chhiat ber ṭuma sawi ni mah se MPL champion lai laka point hlawh chhuak turin an la huaisen tawk.
An ṭawng huai lo
Inkhelh hmain an ṭawng huai ngam lo ve ve.
Aizawl FC coach Mala chuan, "Dinthar FC lakah result ṭha kan neih theih loh avangin kan ṭhat theih dan berin kan khel ang a, hneh ve ngei ngei tawh kan duh," tiin Vanglaini palai a hrilh.
Hetihlai hian Dinthar FC coach Lalnunhlua Sailo chuan, "AFC laka point khat kan hlawh chhuak ve thei te a nih chuan result ṭha bik a ni," tiin team chhe zawk an ni tih a pha lo.
Dinthar an ni tlat
Dinthar FC-in an veng pa Lalhlua coach atana an lak luh hnuah veng mipui ṭawiawmna ṭha zawk an nei a, Aizawl FC lakah chak an inbeisei lo (?) chung pawhin Lammualah an pungkhawm ṭha hle.
Aizawl FC-in ṭan phat aṭangin ball an chang tam a, goal venhim tum Dinthar FC-in a hun taka an nawr lêt bawk si avangin Mala hoten inkhel harsa tak an hmachhawn dawn tih a hriat theih nghal.
Dinthar tlarhma finishing a ṭhat tawk loh avangin minute 90 chhunga vawi kua goal attempt an neihah vawi khatmah goal zawnah a kal lo a, AFC keeper Zothanmawia tan erawh buaina tur a tam viau thung. Team
ṭha zawk Aizawl FC erawhin vawi 25 zet goal attemt an nei a, goal zawnah pawh vawi 10 zet kalin Dinthar keeper Isak Lalmuanpuia a rim hle.
Luangmual FC keeper hlui Isak-a tih theih bakah goal ban leh crossbar-in Dinthar a chhan bawk a, chutihrualin AFC hi inchhuang thei an ni lo. Hun tawp hma hretin Dinthar FC forward Lalruatpuia'n keeper T. Mawia chauh a hmachhawn hnuah a khung lo a, midfielder Joseph Lalṭhafala'n a hun ṭha neih chu engmah loah a chhuah bawk.
An ṭawng huai tawh
Aizawl FC coach Mala chuan, "Kan intum leh dawn alawm, in lo thlir dawn nia," tiin Zonet TV-in a kawmnaah a sawi.
Hemi hnu hian Vanglaini palai hrilh zuiin Mala chuan, "Chapo vangah min ngaihsak loh ka beisei, ka sawi tum chu Dinthar hi kan tum leh dawn. Chumi hunah chuan chak ngei ngei tumin kan thawk chhuak leh dawn. Kan inkhel hi football ngaina chin chuan en vek se ka duh a ni," tiin table mawngphaha awm laka point thum hmuh loh chu a la na hle.
An vanneih thu sawi langin Mala chuan, "Chance ṭhahnem tak chu kan hlah ngei a, keini pawh kan vannei ve bawk a ni. Hun tawpah khan pet goal se tih theih kan nei tawh lo," a ti.
Dinthar coach Lalhlua chuan, "Kan thawkrim em em a, Aizawl FC ven dan tur uluk takin kan zir a, ka naute an khel ṭha. Chutihrualin kan vanneih vangin point khat hlu tak kan hlawh chhuak a ni," tiin an dinhmun a hmuh dan a sawi.
Tute nge inlan?
Dinthar FC (4-2-3-1) : Isak Lalmuanpuia; Stephen Lalnunmawia, Lalremtluanga, VL Chhanhima, Lalbiakzuala; Joseph Lalthanfela, Lalbiaknia Pachuau; Samuel Laltlanthanga (Lawmsangzuala 90+4), Saihmingthanga, R. Lalnunmawia (Chawngthansanga 80' (R. Lallawmkima 86')); Lalruatpuia.
Aizawl FC (4-4-2) : Zothanmawia; Ricky Lallawmawma, Lalramchullova, Lalrinzuala Khiangte, Lalhriatrenga; Brandon VL Remdika (William Lalnunfela 58'), Rohmingthanga, B. Zoramthara, Albert Zohmingmawia (Lalnuntluanga 75'); F. Lalremsanga, Bright Middleton Mends
ZoFooty Statistics
Dinthar FC 0 - 0 Aizawl FC
MoM : Lalremtluanga, DFC
0 Goals 0
33% Ball Possession 67%
9 Shots 25
0 On Target 10
0 Yellow Cards 1
0 Red Cards 0
Powered By Rainbow Multibrand
Mobile Showroom