Chhuanlam duh lo Klopp

Vawiin tlai dar 5:00-ah khualmualah Liverpool-in Swansea City an lenchilh dawn a, May thlaa Liberty Stadium-a 3-1 a an lo hneh tawh loh team lakah Reds manager Jurgen Klopp chuan chhuanlam siam a theih tawh loh tur thu a sawi.

Klopp chuan, "Season hmasaah kha chuan Villarreal khelmuala kan zin chauh hnu lawkah Swansea kan lenchilh a, nasa taka player thlak danglam a ngaih avangin kan buai a, chak loh chhuanlam ṭha tak kan nei. Kuminah erawh chhuanlam tur engmah kan nei lo, chawlh hah-damna hun ṭha kan nei a, training ṭha takin kan nei thei a, chak ngei ngei kan mamawh a ni," a ti.

Liverpool-in tun season-ah league match ruk an khelh aṭanga point 13 hmuin table-ah palina an ni mek a, an match hnuhnung pariata goal 26 khung thei team hian tlarhmaah harsatna an nei lo hle. Klopp chuan, "Season bul kan ṭan dan a lawmawm a, chutih rual chuan phul hlut nan a la hma mah mah a, game tinah hmasawn zel kan tum a ni," tiin lawm nan chuan a la hma mah mah thu a sawi.