Zo United-in goal an khung ve ta

Nimin khan Zo United-in Lalnunsanga (Tale-a) hmangin Mizoram Premier League Season 5-a an goal hmasa ber an khung a, inkhel pawimawh takah Ramhlun North 1-0 in an hneh.

Vanlalrova'n match nga chhung goal an khung tawh lo chungin Tale-a chungah rinna a nghah ngam thu Vanglaini palai hnehah a lo sawi tawh a, Armed Veng South tlangvalin a pu rinna chu goal hmangin a chhang let. Zo United-in point ruk hmuin panganaah an invawrh chho a, Ramhlun North erawh match khata khel tlemin pasarihnaah an awm.

MPL kaithar Ramhlun North hian Dinthar FC leh BVT laka point li an hlawhchhuah hnuah a zawn zatin Chanmari FC, Chanmari West leh Zo United te an hneh lo.

Lalruatliana Sailo hote hian Thawhṭanni tlai hian Aizawl FC an hmachhawn dawn a, I Day Football final rematch hi a pawimawh ang. I League club Aizawl FC hi champion lai ni mah se match hnuhnung paliah point li chiah an thun bakah goal hnih chiah an khung.

Tale-a leh goal

Zo United-in Chanmari West aṭanga an lakluh Lalnunsanga an chhawr thei lo reng a, Chanmari FC nen an inkhelh ṭumin Tale-a'n beisei a pha lo.

Striker nei mumal loa season bul ṭan Zo United coach Rova'n Armed Veng South tlangval chu an team tana player pawimawh a ni tih hriain Ramhlun North an khelh ṭumin a vawi hnih nan inkhel bul ṭantu zingah a dah nawn.

Tale-a hian minute 10 pawh ral hmain chance ṭha nei nghal mah se a taksa chak tawk loh vangin Ramhlun North captain Lalramthlamuana'n awlsam takin a nek sawn. Amaherawhchu talent nei ṭha bik Tale-a danglamna minute 19-naah a lang a, box pawn chiah aṭangin mawi zetin a volley goal a, chakna goal ni tur khawpa mawi a ni.

Zo United forward hian goal dang a khung belh thei lo a, winger Laldinliana Varte-in a tawp a zawh theih ṭhin loh avangin Rova hoten goal khat bak an khung thei lo.

MPL kaithar vanduai

Ramhlun Noth tan midfielder Zosangliana (Chhaia) a hmuhnawm leh a, amaherawhchu MPL tlarhmaah a hmawr bawk thei an awm lo.

Inkhelh ṭantirh lamah MC Malsawmzuala, Vanlalthlamuana leh David Lalrinchhana ten chance ṭha an hlah vek a, Zo United tan defender Malsawma Chhangte a ding khawng ve bawk. Champhai tlangval hian Ramhlun North ball vawrh luh ṭhahnem tak a tauh chhuak a, team chakna kawngah a pawimawh hle.

Hun tawp lamah Ramhlun North player-te goal nawr a na lehzual a, B. Malsawmzuala'n hnai tak aṭanga a hlah bakah Thlamuana'n cross bar a pet per a, first half ang thoin hun chanve hnu lamah MC-a a vannei chuang lo. Handball vanga penalty shout chu referee-in a pe lo a, offside vangin Ramhlun North goal khung pawm a ni lo bawk.

Eng nge an sawi?

Zo United president Lalṭanpuia chuan, "Goal kan khung a, kan chak bawk avangin kan result-ah kan lawm hle. Inkhel thlirin kan vanneihna chen chu a awm a, chak kan phu ve bawkin ka hria. Dinthar FC kan hmachhawn dawn a, Aizawl FC draw thei hi hneh an awlsam dawn lo tih hre mah ila point thum kan beisei ang," tiin Vanglaini palai a hrilh.

Ramhlun North coach Lalruatliana Sailo (Tawia) chuan, "Kan rilru put hmang kan thlak a ni. MPL ṭan hmaa kan chet ṭhat vang a ni thei a, eng pawh chu ni se tunah chuan insiamṭhat kan mamawh a ni. Goal khung kan harsat avangin training pawh kan thlak a, Zo United nena kan inkhel bikah chuan an ni lam kha an vannei ve bawk a ni," tiin an result-ah a lungawi lo.

ZoFooty Statistics

Zo United 1 - 0 Ramhlun North

ZUFC : Lalnunsanga (Talea) 19'

MoM : Malsawma Chhangte, ZUFC

1 Goals 0

42% Ball Possession 58%

14 Shots 22

7 On Target 8

2 Yellow Cards 2

0 Red Cards 0

Powered By Rainbow Multibrand Mobile Showroom

Tute nge inlan?

ZUFC (4-2-3-1) : LK Lalhmangaihzuala; Vanlalruata, Malsawma Chhangte, Lalnunpuia Pachuau, Vanlalremsanga (Lalbiakkima 87'); Hmingthanzauva (Isak Vanlalpeka 78'), C. Laldinmawia; Vanlalhmangaiha (R. Lalthantluanga 72'), H. Malsawmtluanga, Laldinliana Varte; Lalnunsanga.

RNFC (4-4-2) : Liansangpuia; Lalruatfela (Lalchhuanpuia 66'), Lalramthlamuana, C. Ramdinmawia, Lalmuanawma; Vanlalthlamuana, Zosangliana Sailo, Lalruatkima Dosel, David Lalrinchhana (Jerry F. Zonunsanga 46'); MC Malsawmzuala, B. Malsawmzuala.