Spurs hmaah City tan fiahna

Pep Guardiola-a'n match 10 chhung Manchester City a chak zawn pui hnuah Celtic 3-3 in a inhnehtawkpui a, Spanish manager hian, "Goal thum kan chhuah a nih chuan insiam-ṭhatna tur kan nei tih-na a ni," tiin a sawi. Pa-thianni zan dar 6:45-ah Premier League clubṭha Tottenham Hotspur an lenchilh dawn a, White Hart Lane-ah Pep-a naute an insiamṭhat leh ṭhat loh a hriat dawn.

City-in an match hmasa 10-a hnehna an chan khan a zawna game hautak khelh tur an neih loh vangah kan puh a nih pawn a awm lohna a awm lo. Pathianni zana Spurs an hmachhawn zawhah erawh Ro-nald Koeman hoa insiamṭha mek Everton an mikhual ang a, Champions League-ah Barcelona an lenchilh leh dawn bawk - City leh Pep tan Spurs hi fiahna bul inṭanna a ngaih theih a ni.

De Bruyne tel loin

Manchester City-in khual-muala Swansea City an hneh ṭumin Kevin de Bruyne chu hliam vanga lakchhuah a ni. Pep-a'n Lionel Messi chiah tluk loh nei anga a sawi Belgian midfielder hian Spurs a la hmachhawn thei dawn lo. Captain Vincent Kompany pawh hliam vangin a la chawl mek a, Tottenham tan hriat a nuam khawp ang.

Kanei aiah Son

Tottenham-in hliam vangin an striker chhuanvawr Harry Kane an chhawr thei dawn bik lo a, season hmasa Premier League top scorer awm lo mah se lunghnur lutuk tur erawh an ni lo - Son Heung-min an nei tlat! South Korean striker hian season hmasaa pound maktaduai 22-a Spurs a zawm hnuah beisei phak lo mah se tun season-ah a theihna tak tak a pholang ṭan a, match nga inlanah goal nga a khung der tawh. City tlarhnung tan ngaihthah a thiang dawn lo.

Khaikhinna

City-in league match rukah hnehna la chang fai vekin table chung berah an awm a, an hnuai chiaha awm chu vawi ruk khelha tlawm hmel la hmu lo ve tho Spurs an ni. London club hian vawi li hnehna chang tawhin vawi hnih an khingpui an inhnehtawkpui a ni. City hian league-ah ringawt goal 18 khung tawhin Spurs goal khung tawh zat hi 10 a ni thung. Tottenham-in match tinah vawi 13.2 zel shot nei ang an ni a, City hi 12.8 a ni thung - Spurs hian an goal shot 12.7% goal-ah an chantir a, City-in 23.4% an chantir.