Bayern Munich tan insiamṭhatna hun

Carlo Ancelotti enkawlna hnuai-a a vawi khat nan Bayern Mu-nich an tlawm a, nikum Champions League semifinal aṭanga pet chhuaktu Atletico Madrid bawk an ngam lo leh. Zanin hian Bundesliga khel turin dar 7:00-ah Cologne an lo mikhual ang - Italian manager tan a result ṭha lo hliahkhuhna hun ṭha a ni.

Ancelotti chuan, "Atletico lakah khan inkhel hautak kan hmachhawn a, khelmual chhungah mawi takin ball in pe kual thei mah ila tlarhnung a phui loh chuan kan khingpui ten min hrem nghal ṭhin," tiin goal venhim pawimawh zia a sawi.

Tun dinhmunah Bayern hian nipui laia an lakluh Mats Hummels chu khup hliam vangin an chan mek a, central defender rinrawl pakhat zawk Jerome Boateng pawh damkawr mai a la nih avangin tlarhnungah harsatna an nei mek.