Chelsea hmachhawn tur Phelan a fimkhur

Hull City manager lailawk Mike Phelan chuan zanin dar 7:30-a an mikhual tur Chelsea lakah point hlawh chhuak tur chuan fimkhur taka an khelh a
ṭul thu a sawi chhuak.

Premier League match ruk khelh tawh aṭangin Hull hian point sarih hmuin league table-ah 14-na an ni mek a, zanina an mikhual tur Chelsea hian an match hnuhnung berah Arsenal 3-0 in an hneh lo - Blues insiamṭhat tum tur hi Hull tan phurrit an tling ang.

Phelan chuan, "Inkhelh apianga point hmuh hi a pawimawh a, Arsenal leh Liverpool kan hmachhawn ṭum kha chuan a harsain kan chesual nasa hle. Chelsea lakah erawh khatiang thil thleng nawn tawh lo turin kan fimkhur ang. Point hmu tur chuan player hnawhchhuah an awm loh a pawimawh bawk," a ti. Hull hian Arsenal 4-1 a an hneh loh hnuah Stike City 2-1 in hneh mah se an match hnuhnung berah Liverpool lakah 5-1 in an tlawm.