Newcastle-in Bentaleb an lalut

Premier League club Newcastle United chuan Schalke 04 midfielder Nabil Bentaleb chu season tawp thleng atan loan-in an lalut a, an duh a nih chuan a nghetin an lalut thei ang. 

Algeria tana vawi 35 inlan thei midfielder hian Tottenham Hotspur-ah a career a ṭan avangin English football-ah a mikhual lo a, kum 2016 khan Schalke hi a zawm. Schalke a pan tirh hian loan-in a zawm phawt a, February 2017 khan a ngheta khel turin kum li atan contract a ziak a ni. German club tan hian inelna hrang hrangah match 97 khelin goal 19 a khung. 

Kum 25 mi midfielder chuan, "Premier League-a ka lo kir thei hi ka lawm takzet. Coach leh club-ten ka chungah rinna an nghat a, hei vang hian thutlukna dik tak ka siamah ka ngai a ni," a ti. Player nungchang ṭha lo ve tak Bentaleb hi March 2019 khan Schalke chuan a nungchang vangin an hrem a, tun season-ah German club tan hian a inlan miah lo. Magpies boss Steve Bruce chuan, "Premier League-a lo khel tawh avangin kan duh a ni," tiin a sawi a, Champions League hial lo khel tawh player a nih avangin a tawnhriat chu an ṭangkaipui a beisei thu a sawi.