Point thum nen NE United-in bul an tan
Football khawvel ngaihven Indian Super League Season 3 chu Inrinni zan khan Indira Gandhi Stadium, Guwahati-ah a hawnna neih a ni a, NorthEast United-in minute 55-naa Katsumi Yusa goal hmangin Kerala Blasters 1-0 in an hneh nghal.
Mohun Bagan aṭanga NorthEast United zawmtu Kat-sumi goal khung hi Argentine forward Nicolas Velez siamsak a ni a, field sir aṭanga kum 26-a upa forward ball pet phei khung hman tur hian Katsumi a che rang hle.
Highlanders hian Mizo rawl--thar duhawm rual Lal-lian-zuala Chhangte, Jerry Mawi-hmingthanga leh Lalrempuia Fanai te kawl mah se Portugal coach hlui Nelo Vingada-a'n tawnhriat la nei tlem player pa-thum hi inkhel boruak sanga chhawr rih loh a thlang zawk a, bench lamah an hun an hmang tluan.
Vingada lawm a kim lo
NorthEast United coach Nelo Vingada chuan, "Hnehna changa point hmuh belh zel tur chuan tun aia ṭha zawk hian kan khelh zel a ngai a ni. Second half-ah goal khung kan mamawh em em laiin kan khung a, kha kha kan vanneih pui a ni," a ti.
Asian football-a tawnhriat ngah tawh tak coach chuan ISL fak chhunzawmin, "FIFA-a India ranking a hniam tih ka hria a, mah se ISL hi chu Asia-a league ṭha pasarih zinga chhiar tel tlak a ni. Korea, Japan, Saudi Arabia, Iran, Qatar leh China-te an awm tih ka hria a, heng hmunah hian ka thawh tawh avangin India nen an danglamna kei chuan ka hmu tam lo a ni," tiin ISL a dah sang hle.
A match hmasa bera Mizo rawlthar rual chhawr lotu coach chuan, "Zanina ka starting XI kha team tana ṭha ber tura ka hriat ka rem a ni. Player
ṭhenkhat zingah hliam dam chiang lo, 90 minutes khel tlak lo an awm nual a, Indian player kan chhawr tam theih hunah result duhawm zawk kan neih belh ang," tiin a squad-a player naupang zawkte chu chhawr a la tum dawn chauh thu a sawi.
Pune hmaah Mumbai
Nizan khan Chennaiyin FC chuan khualmualah Atletico de Kolkata an lenchilh a, he chanchin buatsaih a nih lai hian an result kan hre hman lo. Zanin dar 7:00-ah inkhel en tur a awm lehnghal dawn a, Maharashtra Derby-ah Pune City leh Mumbai City an in-hma-chhawn ang.
Pune City hian Armed Veng tlangval Zodingliana Tochhawng an kawl a, I League lama Shillong Lajong midfielder lo hi chu Mizo kawl an nei lo thung. Pune tan boruak nei lian tak Eidur Gudjohnsen chu hliam vangin tun season ISL-ah a inlan leh thei dawn lo a, Barcelona leh Chelsea striker hlui aiawh tur hian Liverpool leh Juventus midfielder hlui Mohamed Sissoko chu lakluh a ni.
Mumbai City-ah North Mualcheng tlangval Lalhma-ngaihsanga Ralte, Aizawl FC captain hlui David Lal-rinmuana leh tawnhriat ngah Lalchhuanmawia Fanai te an awm. Lengpui tlangval Chhuantea hi hliam vangin a in enkawl mek a, I League-a a club khelhna Bengaluru FC-in AFC Cup an la khelh mek avangin a la inlan lo ang. Mumbai tan Atletico Madrid striker hlui Diego Forlan a en tlak khawp ang.