China-ah Kvitova a thiam ber

Petra Kvitova chuan Dominika Cibulkova hnehin Asia-a hmeichhe tennis inelna ngaihhlut tak pakhat Wuhan Open champion nomawi a chawi.

Seeded 14-na Kvitova hian darkar khat leh minute thum chhungin seeded 10-na Cibulkova hi 6-1, 6-1 in a hneh a, Wuhan Open-ah hian vawi hnih a champion-na niin tun season-ah erawh WTA title a lak hmasa ber a ni thung.

Kum 29-a upa Kvitova hian nomawi chawi tur hian fiahna hautak a paltlang - world number 1 Angelique Kerber leh seeded palina Simona Halep bakah Johanna Konta te a hneh a ni.

WTA ranking thara number 11 ni tur Kvitova chuan, "He hmunah hian nuamti takin tennis ka khel thei a, a boruak awmdan hi nuam ka tiin ka title pahnihna ka la thei hi ka lawm tak zet," tiin a sawi.

Tennis inelna khaw-velah Europe leh America lama season an hman zawh hnuah Asia lamah inelna neih chunzawm a ni a, tunkar chhung hian China Open khelh zui leh a ni ang.

Hmeichhe doubles lamah India star Sania Mirza leh a kawppui Barbora Strycova te chu final-ah Bethanie Mattek-Sands leh Lucie Safarova te ṭangdun lakah 1-6, 4-6 in an tlawm ve thung.