Bayern Munich-in point an hloh

Carlo Ancelotti-a'n a enkawl hnuah Bundesliga champion Bayern Munich chuan a vawi khat nan point an hloh! Inrinni zan khan an mikhual Cologne nen 1-1 in an inhnehtawk. Inkhel dangah Borussia Dortmund chu Bayer Leverkusen lakah 2-0 in an tlawm thung.

Allianz Arena-a inkhelah Bayern tan German rawlthar duhawm Joshua Kimmich chuan minute 40-naah tauh lutin hma hruaipui mah se secondhalf-ah mikhual tan Anthony Modeste-a'n an siphurh sutin goal dang a lut zui lo.

Ancelotti chuan, "Kan result hi a lawmawm loh a, mahse lung-ngaih-na tur a awm lo. Season bul kan
ṭan ṭha hle a, kan match hnuhnung pahnihah erawh beisei kan phak lo thung. Ka naute lakah rinna ka la hloh lo," tiin a sawi.

Italian manager kaihhruaina hnuaiah Bayern hian an league match hmasa pangaah hnehna an chang vek. Tun hnai an match hnuhnung pahnihah beisei an phak ta lo a, Champions League-ah nikum semifinal-a an ngam loh Atletico Madrid an ngam lo nawn a, league-ah tho leh nghal tura beisei ni mah se point an hloh zui nghal.

Bayern-in point an hloh hi an elpui Dortmund tan an inthlauhna tihzimna hun ṭha ni mah se Thomas Tuchel-a nauten an chhawrṭang-kai thei lo. Leverkusen tan hian Man-chester United striker hlui Javier Hernandez leh Admir Mehmedi ten goal an khung.

Tuchel chuan, "Vawi 21 zet foul kan tuar a, Gonzalo Castro leh Sebastian Rode te chuan hliam an tuar bawk. Leverkusen player hnawhchhuah an ni lo kha an vannei," tiin an khelhpuite chet danah a lungawi lo hle.