Chelsea an chak ve ta

League match hnih chhung a zawna an chak loh hnuah Chelsea-in chak hmel an hmu ve ta a, khualmualah Hull City chu Willian leh Diego Costa goal khung hmangin 2-0 in an hneh.

Firsthalf-ah Hull City-in inkhel thunun zawk mah se chawlhlawk laiin Blues lamin thu ṭha an ngaithla tih a chiang a, Willian chuan Diego Costa thawhrah chhawr
ṭangkaiin minute 61-naah goal hmahruai a khung. Minute ruk a liam a, Costa bawk inlarin Spain international hian league match sariha a goal rukna khungin Chelsea hi hnehna a chanpui.

Chelsea boss Antonio Conte chuan, "England-ah chuan kan match zawng zawng hi a harsa em em vek a, goal hnih khunga goal kan chhuah miah loh avangin kan khelh danah ka lawm takzet a ni. Chelsea tan chuan match hnih chhung a zawna tlawm kha a nasa mah mah a, zanin kan result hi chhanna ṭha tak a ni. Hna kan thawh chhunzawm zel ang," tiin nomawi chawi tura an thawhrim tur thu a sawi.