Hammers tan Dimitri Payet bawk

West Ham-in an mikhual Mid-dlesbrough lakah goal chhuah hmasa zawk mah se Dimitri Payet an neih miau avangin an mikhual lakah point khat an hlawh chhuak a, French midfielder hian an si phurh sutna goal danglam leh ropui bik a khung.

Boro tan Cristhian Stuani chuan minute 51-naah mikhual team tan goal hmahruai a khung a, Payet hian minute ruk hnuah a thungrul lehnghal. France international hian Boro tlarhnung a chaih phar hnuah an si phurh sutna goal hi khungin league match li a zawna an tlawm hnuah point an hlawh chhuak ve ta.

West Ham manager Slaven Bilic chuan, "Table-a kan dinhmun enin lungawina chi a ni lo a, match li a zawna kan tlawm tawh miau avangin pressure a sang tih hi zep buai ka tum lo. Hetiang taka result neih chhiat hi ka nihphung nen a inmil lo a ni. Engpawhnise, he team hi kan lungrual a, ṭha taka khelh zel a pawimawh," tiin a sawi.

Hammers aia season bul la ṭan fuh lo Sunderland-in Premier League-ah chak hmel an la hmu thei chuang lo a, an mikhual West Brom-in Nacer Chadli hmanga goal hmahruai an khung hnuah minute 83-naa Patrick van Aanholt goal khung hmangin point an hlawh chhuak hram a ni.

Premier League inkhel dangah Watford leh Bour-nemouth chu goal hnih ve ve khungin an inhnehtawk a, mikhual team Cherries-in Callum Wilson leh Joshua King hmanga vawi hnih zet hma an hruai hnuah Watford hian Troy Deeney leh substitute Isaac Success hmangin an chhanglet a ni.