Derby Danglamna Dampuia - Chanmari ngamtu West!

Chanmari Derby-a Chanmari FC rorelna chu Chanmari West-in HC Zarzoliana ruahmanna fing leh captain Laldampuia goal hnih hmangin an chhu chhia a, Zirtawpni zan Lammual inkhel hmuhnawm takah Chanmarians aiin West Warriors-in inkhelh an thiam zawk.

Chanmari West-in first half-ah Kawrte-thawveng tlangval Dampuia hmangin goal hnih an khung a, second half-ah Malsawmfela hmangin Chanmari FC-in goal khatin chhang let mah se minute 90 zawhah chak phu zawk West Warrior 2-1 in an chak.

'Double D'

West Warrior boss Zara'n winger a hmang thiam a, chumi mil chuan player a la ṭhin tih a club enkawl tawh Dinthar, Chanmari leh Chanmari West-ah kan hmu.

MPL1-a Dinthar champion theih nan Danmawia leh Lalnunmawia te an inthlawp fuh em em a, tun ṭuma Dampuia leh Danmawia te inkawp hian kum li liam taa 'Dinthar winger' te kha an el pha mai ni loin an khum hial ang.

Double D te hi striker chak H. Lallian-zama leh amah puitu Lalmuanzuala ten an thlawp ṭhat avangin Chanmari tlarhnungin dan ngaihna an hre lo a ni ber. Inkhelh
ṭan hnu lawkah Dampuia'n hla tak aṭangin goal-ah a pet thut a, Chanmari crossbar ri nghal dawpin a per goal zui lo.

Minute 8-na leka halfway line aṭanga ball fing chu Danmawia'n a duhthusamin la thla lo mah se MPL1 best player ke aṭanga ball chhuak chu Dampuia'n a pet goal.

West Warrior-in first half an thunun a, Lallianzama thawhrah chu Dampuia'n nalh taka Chanmari defender a bum hnuah goal-ah chantir lo mah se a per chu a tauh goal leh hman tho. Kawrtethawveng tlangval hian goal khung turin huaisenna a nei a, khelmual chhunga hlauh a neih loh avangin player langsar ber a ni.

Chanmari West an hmuhnawm a, first half-ah hian Danmawia'n goal khung ve ngeiah inngai mah se referee berin goalline (pelh hnuah?) aṭangin Thomas Lalengkima'n a pet chhuak hmana a ngaih avangin Chanmari FC an him hlauh.

Comeback?

Chanmari FC-in first half an khelh ṭhat loh avangin an lungawi lo a, referee-in Lalmuanzova yellow card a pek danah an lawm lo bawk. Aizawl FC winger hlui hi Zo United an khelh ṭuma box chhunga tluk der vangin yellow card pek a ni tawh bawk a, West Warrior nen erawh Muanzova hi a tlu der lo a ang zawk mah?

Chanmari team chhung boruak siam fuh a har chho a, chuti chung chuan team ṭha zawka ngaih hian thawhchhuah ngei tumin an nawr let. West Warrior tlarhnung phui ṭha tak an paltlang hlei thei lo a, minute 58-naah player 'special' bik Malsawmfela'n beiseina an neih leh theihna turin goal khung mah se result an thlak danglam thei lo.

Hun tawp lamah West Warrior-in Dampuia leh Lianzama tlan chakna hmangin an nawr let thut a, Chanmari FC-in goal dang an chhuah belh loh avangin an vannei.

Chak kan phu - Zara

Chanmari West midfielder ten ball an chan apiangin an winger ṭha pahnih an zawng nghal a, Chanmari FC-in dan ngaihna an hre lo. Hei vang hian game plan fuh tak Zara'n Chanmari FC-a amah thlaktu Sanga 'tactical battle'-ah a hnehah a ngaih theih.

West Warrior boss HC Zarzoliana chuan, "Chak kan phu zawkin ka hria. Match official te kha taimain an hna uluk se chuan kha aia tam goal kan khung ang mawle," tiin Vanglaini palai a hrilh a, anmahni ṭantute chungah lawmthu a sawi bawk.

Chanmari West ṭantute Lammualah tui takin an zai thei a, chumi ti thei tur chuan an ṭhahnem tham bawk. Player-te khelh ṭhat zanah an supporter-ten an hna an tlin hle.

Kan tho leh ang

Chanmari FC manager Mawitea chuan, "Vawi khat chak loh avangin kan tlachhe ta viau tihna a ni lo. Kan rawn tho leh em em ang," tiin an insiamṭhat vat tur thu a sawi.

MPL5-a a vawi khat nan Chanmari FC-in hneh loh an tawng a, an club history-a a vawi khat nan Chanmari West an hneh lo.

ZoFooty Statistics

Chanmari FC 1-2 Chanmari West FC

CFC : Malsawmfela 58’

CWFC : Laldampuia 8’, 43’

MOM: Laldampuia, CWFC

1 Goals 2

50% Ball Possession 50%

12 Shots 13

6 On Target 7

1 Yellow Cards 3

0 Red Cards 0

Powered By Rainbow Multibrand

Mobile Showroom

Tute nge inlan?

CFC (4-2-4) : MS Dawngliana; C. Lalrosanga, MS Dawngzela, Lalrinchhana Tochhawng, Thomas Lalengkima; Lalrinchhana, R. Malsawmtluanga (Reuben Zosangpuia 42'); Lalmuanzova, Malsawmfela, Lalrammawia, Thasiama (Isaac Lalruatpuia).

CWFC (4-1-4-1) : Lalruatpuia; Vanlalzuia Hnamte; R. Lalawmpuia, Toky Zomuanpuia, Calvin Zosiamliana (Racy K Lalengmawia 78'); K. Lalnunzama; Laldampuia, Lalbiakhlua, Lalmuanzuala, R. Laldanmawia; H. Lallianzama (R. Lalremruata 89').

Subs: Lalmalsawma Hmar, JH Lallawmkima, Lalremsanga, Lalhmachhuana Ralte, Ramengmawia, PC Lalhruaitluanga, Lalruattluanga.