Vawiin 2:30 PM-ah I Day Football Final Rematch

Aizawl FC-in second 10 chiah a awm tawh tihin kumin I Day Football Final-ah Ramhlun North FC laka an si phurh an sut a, extra time-ah goal luh belh tawh loin penalty shootout-ah 7-6 in hnehna an chang.

Vawiin tlai dar 2:30 hian I League club AFC leh MPL kaithar Ramhlun North te a vawi hnih nan an intawng leh dawn a, tun hnaia result nei ṭha lo pahnih inkhel hi a pawimawh.

Goal khung thei lo AFC

Aizawl FC-in Bright Mid-dleton Mends an lalut a, Ghana aṭang meuha striker lakluh chu a ṭha tura ngaih a ni. Ghanaian forward hian theihna a nei tih chu pholang ve tawh bawk mah se MPL-ah goal a khung lo.

MPL champion lai hian Zo United (3) leh Chhinga Veng (2) lakah goal khungin hnehna an chang a, amaherawhchu Bethlehem VT, Chanmari FC leh Dinthar FC lakah goal an khung lo.

K. Malsawmkima hote hian MFA Super Cup leh I Day Football-ah an tlarhnung zarah nomawi an chawi a, defender Lalruatthara'n ISL club Delhi Dynamos a zawm san leh tawh bawk si avangin tlarhnung pawhin MPL ṭan hma a pha lo.

AFC-in hun rei tak an beisei tawh Nigerian midfielder Benjamin Onome Eniwo chu nimin khan a rawn thleng a, vawiinah erawh an chhawr kher a rinawm loh.

Aizawl FC assistant coach Lalruatdika chuan, "MPL club hi team ṭha vek an nih avangin chak turin thawhrim a ngai. Kan team kan inlungrual a, kan thawhrim bawk avangin chapo thu hla ni lo sela kan chak ngei pawh ka ring," tiin Vanglaini palai a hrilh.

Insiamṭhat mamawh

Aizawl FC ai mahin Ramhlun North-in goal khung an la harsat a, Zosangliana goal hnih chiah an la ring.

MPL kaithar hian Dinthar FC leh Bethlehem VT lak aṭangin point li hmu nghal mah se Chanmari FC, Chanmari West FC leh Zo United an hneh lo vek.

Ramhlun North coach Lalruatliana Sailo chuan, "Kan rilru put hmang thlak a ngai a ni," tiin a sawi a, vawi thum a zawna chak lo tan chuan vawiin hi insiamṭhat hun a ni.