Arsenal chak zanah United chak zo lo

Hamrik hnuhnung ber rik ruala Laurent Koscielny goal khung hmangin Arsenal chuan Burnley an hneh. Pathianni zan Premier League inkhel dang-ah Manchester United leh Leicester City te an chak zo lo thung.

Vanneih point 3

Arsene Wenger-a'n kum 20 zet Gunners a enkawl tlin hnua an match hmasaah hian team pahnihte goal awm loin an inhnehtawk mai dawn niin a lang hman a, minute 90+3-naah Alex Oxlade Chamberlain-a ball pet chu Koscielny-a'n a lo ti lut - repay ennawn hnuin ball hian French defender kiu hi a fuh ngei niin a lang (?)Mahse, referee Craig Pawson-a'n goal-a a pawm miau avangin Arsenal-in point thum an hmu.

Gunners hian inkhel an thunun a, an che rangin ball an inpe kual hnem bawk. Mahse, a hmawr an bawk fuh thei lo, a chhan pakhat chu Burnley tlarhnung phui ṭhat vang a ni. Sean Dyche naute hian an mual bika league match an khelh hnuhnung 17-ah goal nga chiah an chhuah avangin goal ven an thiam tih a chiang a, Arsenal lakah pawh an vanduai vang chauhin an chhuah niin a lang.

Burnley tana hun ṭha neitu defender Michael Keane-a'n goal bar a tihper a, hei bak chu an mikhual hi an chhaih buai meuh lo. Tun hnaia inkawp fuh chho mek Koscielny leh Shkodran Mustafi te inkawp (Kostafi) hi Arsenal tlarhnungah an dingkhawng leh pek hle. Gunners hian an match hnuhnung pathumah goal an chhuah ta lo a, kum 2015 October hnua a vawi khat nana league match nga a zawna hnehna an chan theih nan an thawhhlawk hle.

Gunners manager Wenger chuan, "Ni riat chhungin match thum kan khel a, ka player-te an chauh tih a hriat. Inkhel kha ngun taka kan en chuan 1-0 a chak thei leh chak lo zawk thei dinhmunah kan ding reng a ni," tiin an vanneih thu a sawi.

Burnley boss Sean Dyche chuan, "Ka naute khelh danah ka lawm a, amaherawhchu hun pekbelh a zawh hnua goal lut a nih vang leh handball hmanga goal chhuah kan ni kha a lungngaih thlak hle," tiin an chak loh chhanah referee a puh.

6 - 0 tur - Mourinho

Manchester United manager Jose Mourinho chuan an mikhual Stoke City nen 1-1 a an inhnehtawkna inkhel thlirkirin 6-0 a chak thei dinhmuna an din thu a sawi chhuak!

Old Trafford-ah Man Uni-ted hian 'game mawi' khelin substitute Anthony Martial goal hmangin hma hruai mah se hun tawp dawnah Stoke tan midfielder Joe Allen-a'n a sut a, goal dang a luh belh lo.

Mourinho chuan, "5-0 emaw 6-0 emaw a chak thei tur chu kan ni. Hun ṭha kan insiam hnem a, kan khawhral bakah keeper-in min dan sak bawk," tiin a hmawr an bawk fuh loh thu a sawi.

United hian inkhel thununin vawi 24 zet goal khung tumin an pet a, heng zinga 16 te chu penalty box chhung aṭanga pet niin vawi kua goal zawnah an pet. Stoke keeper Lee Grant chetṭhat ni ni hlauh lo se chuan Mourinho thusawi hi a thleng dik thei hial mai thei.

Chelsea leh Real Madrid boss hlui chuan sawi chhun-zawmin, "Keiin ka hna ka thawk a, player ka siksawi. Ka naute pawhin an hna thawkin na takin kan khingpuite an nawr bawk. Minute 90 chhung inkhel thunun chungin chak tumin kan bei a, kan khel
ṭha bawk. Football-ah chuan hetiang result hi a thlen chang a awm reng a ni," a ti. Portuguese manager hian Stoke chu chak tum ngam loah a puh tel zauh bawk.

Stoke City hian season bul an ṭan fuh lo a, league match sarih an khelh tawhah chakni hmel an la hmu miah lo! August thla khan League Cup-ah Stevenage (League Two club) chu 4-0 in an lo hneh ve tawh - hemi hnu hian league match vawi nga khel tawhin vawi thum an chak lo a, an match hnuhnung pahnihah erawh point khat ve ve an hlawh chhuak thung.

Stoke manger Mark Hughes chuan, "Old Trafford-ah point hmu tur chuan theihna zawng zawng hlan a ṭul reng a ni. Kan inpumkhat ṭha em em a, second half-ah phei kha chuan kan hlauhawm hle," tiin a naute khelh dana a lawm thu a sawi.

Foxes tan point khat

Premier League nomawi kawltu Leicester City leh an mikhual Southampton te goal awm loin an inhnehtawk a, club pahnihte point khat ve veah an lungawi a ṭul.

Mikhual Saints tan Charlie Austin a hlauhawm a, kum 27-a upa forward ball tauh chu goal hrulah a kal bakah goal ban a pet per a, second half-a a chip tawih zet chu keeper Kasper Schmeichel-a'n a dansak bawk.

Foxes hian league match sarih an khelh tawh aṭangin vawi hnih chiah hnehna an la chang a, point riat hmuin table-ah 12-na an ni mek. Hmahruaitu Manchester City an phak lohna chu point 10 zet a ni tawh.

Leicester manager Claudio Ranieri chuan, "Saints khan chak an phu zawk a, point kan hmuh avangin kan vannei hle," a ti. Italian manager hian an tawn chian apiang chu an tan thil thar a nih zel thu leh tunah chuan a player-ten chawlh an mamawh rih thu a sawi.

Southampton boss Claude Puel chuan, "Ka nauten inrin-tawkna an neih avangin hma hun eng tak kan neiin ka hria, champion lai lakah chak thei dinhmunah kan ding a, point thum kan hmu lo kha kan vanneih tawk loh vang chauh a ni," tiin a sawi ve bawk.