Juve leh Higuain an kal zel

Champion lai Juventus chuan nipui laia Napoli aṭanga man to taka an lakluh Gonzalo Higuain-a goal hnih khung hmangin khualmualah Empoli 3-0 in an hneh a, Italian Serie A hmahruaitu an nih chhunzawm zel. Inkhel dangah team intiat tawk AS Roma chuan Inter Milan 2-1 in an hneh thung.

Minute chiah

Juventus-in goal khung theihna hun ṭha tak tak an bawlhpelh hnu minute 65-naah Paulo Dybala hmangin goal hmahruai an khung chauh a, goal khatna a luh aṭanga minute thum a liam hmain Argentine international Higuain chuan an goal hnihna leh thumna a khung zui bawk.

Juve coach Massimi-liano Allegri chuan, "Kan squad hi ni 40 chhung chauh kan la awm khawm a, heti chung hian kan in man tawh hle. Inkhela hnehna chan hi kan tum ber a ni a, thil dang hi chu thu lengvak mai a ni," tiin a sawi. Serie A match sarih khelh tawh aṭangin Juve hian point 18 hmuin anmahni hnaih bertu Napoli lakah point li zetin an sang fal leh der tawh.

Roma chak

Stadio Olimpico-a in-khel-ah Roma hian Edin Dzeko leh Kostas Ma-nolas te hmangin goal an khung a, Inter tan Ever Banega chuan goal khat khung vein Frank de Boer-a nauten an si phurh sut zawhna hun ṭha an neih chu striker Mauro Icardi-a'n a hlah.

Inkhel dangah AC Milan chuan an mikhual Sassuolo 4-3 a hnehin table-ah paruknaah an awm chho a, hetih lai hian season hmasa pahnihna Napoli chu Atalanta lakah 1-0 in an chak lo. Maurizio Sarri naute hi tun season-a league match bikah an vawi khat chak lohna a ni.