A vawi 1 nan Berdych champion

Tomas Berdych chuan kumina a title pakhatna la turin Richard Gasquet chu inkhel inhnehtawk takah 7-6 (7-5), 6-7 (2-7), 6-3 a hnehin Shenzhen Open nomawi a chawi.

Kum 31-a upa Berdych hi hliam vangin kuminah a inkhel tam lo a, tunah hian ATP ranking-ah 9-na niin a thiam pariat ten an khelh ṭhin ATP World Tour Finals khel turin beiseina a la nei.

Czech Republic tlangval chuan, "Chawlhkar nga liamta kha chuan damdawi inah ka la awm a, tunah chuan court-ah nomawi nen ka awm leh ta der mai. Ka vannei a, ka hriselna a ṭhat chhoh bakah tun hma ang maiin ka khel chhuak leh thei nghal," tiin a sawi.