Real an chelh leh ta; Barca an tawlhthlu
Zinedine Zidane-a'n match thum chhung a zawna hnehna an chan zawh loh hnuah an thawh leh tur thu sawi mah se Pathianni zan khan an mikhual Eibar chu 1-1 in an inhnehtawkpui a, inelna hrang hrangah match li chhung a zawnin an khingpui an inhnehtawkpui ta.
Real chak zawh loh zan-ah Barcelona-in La Liga hma-hruaitu nihna hun remchang nei mah se mualpho nan an hmang a, khualmualah Celta Vigo chu 4-3 in an ngam lo. Pathianni tlaia Valencia laka 2-0 a hnehna chang Atletico Madrid chu league hmahruaitu an ni.
Bernabeu a nghing
Club tenau Eibar tan San-btiago Bernabeu-a point hmuh inbeisei chi niin lang lo mah se huaisen taka an khelh miau avangin Real khelmualah point khat hlu tak an hlawh chhuak. French manager Zidane-a'n duh a thlang sual a, captain Sergio Ramos a chawlh hahdamtir zanah Real tlarhnung an talbuai - ṭan aṭanga minute rukna lekah Rico Castro chuan Eibar tan goal hmahruai a khung nghal.
Mualneitu team tan Gareth Bale chuan Cristiano Ronaldo ball cross tauh lutin La Liga-a a goal 50-na a khung a, Real-in an si phurh sut nan minute 11 chiah mamawh mah se goal dang an khung theih miau loh avangin point khatah an lungawi a ṭul. Ronaldo-a'n vawi tam hun ṭha a khawhral a, Real hian hliam vanga midfielder Casemiro leh Luka Modric an chhawr thei lo chu an tuar tih hai rual a ni lo bawk.
Real Madrid manager Zinedine Zidane chuan, "Mi tam takin kan talbuai emaw an ti a, mah se tunah hian October chauh a la ni. Kan tihtur awmchhun chu hmasawn a ni a, lungngai taka indawmkun hun a la ni lo. Rilru chiai taka awm ka tum lo a, ka player-te pawn an tum hek lo. Kan in fit tawk lo tih velah chhuanlam siam ka tum lo a, keimah aṭanga ṭanin insiam-
ṭhat kan tum ang," tiin chak loh chhuanlam a zawng lo.
Barca ngam loh Celta
Barcelona-in khualmualah Celta Vigo an lenchilh a, 4-3 in an mualpho haw. Mualneitu team tan Liverpool duh loh Iago Aspas chu player langsar a ni. An goal hmasa ber Pione Sisto khung chu a siamsak a ni a, goal hnihna ṭha taka khungin Jeremy Mathieu-a'n an lama a tih luh theih nana lo chhaih buaitu chu Spanish striker bawk hi a ni - kum 29-a upa striker hian Barca a ngam hrim hrim a, season hmasaa 4-1 a an sawp
ṭum khan Catalan club lamah hian goal hnih a lo khung tawh bawk.
Mikhual team-in Gerard Pique tauh luh leh Neymar-a penalty hmangin beiseina thar nei mah se goalkeeper Marc-Andre ter Stegen tihsual nangchingin Pablo Hernandez chuan minute 77-naah Celta Vigo goal lina a khung a, minute 87-naa Pique goal hnihnain Barcelona tan awmzia a nei tawh lo. Celta hian Barcelona hi an ngam ṭhin hrim hrim a, team pahnih an inhmachhawn hnuhnung paliah Catalan club hian vawi khat chiah hnehna chang vein a bak zawngah Celta an chungnung zawk vek!
Barcelona coach Luis Enri-que chuan, "Kan chak loh naah tumah mawhpuh tur bik an awm lo. A hmasa berah chuan keima mawhphurhna a ni a, tuna kan tih theih chu kan tlukna aṭanga thawh lehnghal hi a ni. Hmahruaitu nihna hun ṭha nei chungin kan khel a, mah se chu chu kan chhawr thei lo," a ti.
Atletico an kal zel
Diego Simeone-a nauten an league match hmasa pahnihah an khingpui inhnehtawkpui mah se Celta Vigo 4-0 a an sawp hnuah an hawikir tawh lo a, Pathianni zan khan Valencia chu 2-0 in an hneh. Valencia keeper Diego Alves chu player langsar ber a ni a, Brazil international hian Atletico Madrid tana Antoine Griezmann leh Gabi te penalty pet chu vawi hnih ngawt a dang!
French forward Griezmann-a'n match hnih chhung a zawnin penalty pet goal lo mah se minute 63-naah a tihsual thup nan goal hmahruai a khung a, Kevin Gameiro chuan injury time-ah an chak nemngheh nan goal khat dang a khung ve leh bawk.
Atletico coach Diego Sime-one chuan, "Valencia keeper kha a khel ṭha em mai a, goal kan khung tam lo zawk a ni. Ka player-te hnenah khan hnehna chang tur chuan mimal anga khel loa team anga kan khelh a pawimawh thu ka hrilh a, chu chu hnehna kan chanpui ta a ni," tiin point thum hlawh chhuak tura team inlungrualna a pawimawh thu a sawi.