Murray-a'n Djokovic nena inkar tih zim tum

World number 2 Andy Murray chuan ATP number 1 Novak Djo-kovic nena an inthlauhna chu kumin chhung ngeia sawr zim a tum thu a sawi chhuak.

Tunkar chhung hian ATP World Tour zinga pakhat China Open khelh tur a ni a, Beijing-ah hian Andy Murray, Rafael Nadal leh Milos Raonic te an inlan ang. Hetihlai hian Serbian thiampuipa Djokovic erawh a kiu hliam vangin a inlan thei dawn lo thung.

Tun dinhmunah Djokovic hian ATP ranking-ah point 14,040 hmu-in amah hnaih bertu Murray hian 9,345 a hmu mek. Beijing-a champion hian ATP ranking point 1000 a hmuh belh dawn avangin Britain tlangval tan an inkar tih zimna hun ṭha a ni,

Grand Slam vawi thum cham-pion tawh Murray chuan, "Tennis ka khelh hun chhunga ka thil tum pakhat chu number 1 nih hi a ni a, chumi tur chuan phurna leh huaisenna ka mamawh. Tunkar chhunga ka chet dan a zirin Novak nena kan inkar pawh a zim sawt thei a, hun ṭha ka neih hi hman ṭangkai ngei pawh ka tum ang," tiin a sawi.

Kum 29-a upa Murray hian a match hmasa berah world number 94 Andreas Seppi a hmachhawn ang, Italian tlangval nen an in-hmachhawn hnuhung pasarihah hnehna a chan vek avangin Murray hi chak tura rinkai a ni.