Villa-in Di Matteo an ban

Premier League aṭanga an tlak hnuah Aston Villa chuan beiseina sang tak nen Roberto di Matteo an lalut a, Italian manager hian ni 124 chiah a hna a thawk hman tihin Championship club hian an ban!

Chinese sumdawng hausa Dr Tony Xia-a'n June 2 khan Villa hi leiin hemi hnu lawkah Di Matteo hi lakluh a ni a, Chelsea player leh manager hlui hian league match 11 a khelhpui
aṭangin vawi khat chiah chakni hmel hmuin table-ah 19-na a nih pui mek.

Villa buaina hi tun hnai maia inṭan niin a lang lo, 25 October, 2015 a Tim Sherwood a ban hnuah Remi Garde an ruai tawh a, season hmasa an match hnuhnung pasarih kha caretaker boss Eric Black-a'n a enkawl tawh bawk.

Premier League a kir leh ngei tumin Di Matteo hnuaiah pound maktaduai 50 vel sengin player pakua an lalut a, pound maktaduai 17-in player 17 chhuah tirin an insiksawi nasa hle.

Mahse, August 13-a Rotherham United 3-0 a an hneh bak kha chu hneh nei loin a zawnin match kaw chhung chu chak ni hmel an hmu lo a, tun dinhmun hi an thleng ta a ni.

Thu chhuah siamin Villa chuan, "Aston Villa Football Club chuan ma-na-ger Roberto Di Matteo nena thawh dunna a titawp ta. Club siamṭhat tuma a tha thawhah lawmthu kan sawi a, a kal lehzelna turah duhsakna kan hlan," an ti. Villa hi manager an zawn chhung chu assistant coach Steve Clarke-a'n a enkawl lailawk ang.