Malaysia-ah Red Bull an inlar

Pathianni khan Formula 1 Malaysian Grand Prix tlan a ni a, tun season-a roreltu Mercedes driver ten beisei an phak loh laiin Red Bull driver Daniel Ricciardo chu pakhatna niin a teammate Max Verstappen chu pahnihna a ni thung.

Sepang International Circuit-a intlansiak-ah pole position aṭanga bulṭan Lewis Hamilton-a'n lap 15 chauh tlan tur a awm tawh tih thlengin ṭha takin tlan thei mah se engine chiang lo vangin intlansiak a tlan tluan thei lo. Hetihlai hian championship hmahruaitu Nico Rosberg erawh harsa takin pathumnaah a thleng hram.

German driver Rosberg hian driver championship-ah point 288 hmuin amah hnaih bertu British driver Hamilton lakah point 23 zetin hma a hruai fal ta. Champion lai Hamilton tan a nomawi humhim tur chuan intlansiak hmabak panga an la neihah a chetsual loh a ṭul tawh ang.

Kum 31-a upa Rosberg chuan, "Tuna pawimawh ber chu in-tlan-siak apianga point hmuh zel a ni a, tunkara ka chetṭhat ang hi ka chhunzawm zel theih ka beisei," tiin Pathianni lehpeka tlan tur Japanese Grand Prix a thlir nghal.

Hamilton chuan, "Mercedes hian driver pasarih neiin engine ṭha tak kan nei vek a, ka car engine-in harsatna a tawk bik ṭhin hi a chhanna ka hmuh a ngai," tiin intlansiak a zawh ve theih loh chhanah an team hruaitute hrilhfiahna a phut.

F1 MALAYSIA GP RESULTS

1 Daniel Ricciardo Aus Red Bull

2 Max Verstappen Holland Red Bull

3 Nico Rosberg Ger Mercedes

4 Kimi Raikkonen Fin Ferrari

5 Valtteri Bottas Fin Williams

6 Sergio Perez Mex Force India

7 Fernando Alonso Spa McLaren

8 Nico Hulkenberg Ger Force India

9 Jenson Button Gbr McLaren

10 Jolyon Palmer Gbr Renault