AFC tana ênna thlentu Bright
I Day Football Final rematch-ah Aizawl FC-in Bright Middleton Mends-a goal hnih hmangin Ramhlun North FC 2-1 in an hneh a, Ghanaian forward hi man of the match a thlan a ni.
Nimin tlai Mizoram Premier League inkhel hi Aizawl FC-in Durand Cup an khelh avanga inkhelh hun sawn kha a ni a, club pariatten vawi ruk ṭheuh an khelh takah chuan MPL round hmasa leh ber chu Chhangphut Field, Champhaiah khelh a ni tawh ang.
Goal 3
Minute 10-na lekah ding lam kil aṭanga Aizawl FC right back Lalhriatrenga (Achia) cross chu Bright Mends-a'n a tauh goal a, Ghanaian forward-in MPL-a a goal hmasa ber a khung dan hi a en let pawhin a lungawi khawp ang.
Ramhlun North FC-in minute 43-naah Lalchhuanpuia freekick hmangin an siphurh an sut a, Vaphai tlangval freekick petna hi goal-na tur khawp chuan hla deuh niin lang mah se ball sawhna lai a laih avangin AFC keeper Zothanmawia'n a dang thei lo.
Hun tawp hma minute 14 chiah a awm tawh tihin vei lam aṭanga AFC winger Brandon VL Remdika pass chu Bright-a'n hmang ṭangkaiin Ramhlun North defender pahnih a bum hnuah chakna goal a khung.
Inkhel nung lo
Nimin khel a nung lo a, team pahnihte inkhel hmuhnawmna a lantir thei lo. Aizawl FC hian goal hnih khung mah se an goal nawr a na tawk lo a, chak phu zawk an ni nachungin goal hnih khung tur chu an ni lo.
Ramhlun North goal luh danah vanneih a tel a, chutihrualin first half-a Vanlalthlamuana goal khung loh an ui khawp ang. Goal khat ve ve an khung hnuah Aizawl FC-in chak an duh vangin practice pawh la chhim lo player thar Eniwo Benjamin Onome an luhtir a, a zin chauh bawk avangin tun dinhmunah chuan Nigerian midfielder hi danglamna thlentu a la ni rih lo.
Eng nge an sawi?
Aizawl FC coach K. Malsawm-kima chuan, "Kan duh ber chu chak a ni a, kan hlawhtling. Kan khelh danah erawh duhthu a sam lo hle a ni," tiin an khelh danah a lungawi lo.
AFC boss Mala hian Champhaia chhawr a duh avangin Nigerian midfielder hi a la inpeih lo chunga a chhawr luih thu a sawi tel bawk.
Ramhlun North coach Lalruatliana Sailo chuan, "Result a ṭhat loh hi chuan player-te pawh an phur thei lo, kan khelṭha lo," tiin Vanglaini palai a hrilh.
Inkhelh banah MC Malsawm-zuala chu mawi lo taka chet avangin hremna a hmachhawn ngei rin a ni. Ramhlun North coach Tawia chuan, "Buaina tam tak hi chu referee-in hrem tur an hmuh hmaih ṭhin avanga thleng te a ni ṭhin a, kan khingpuite pawh referee thutluknaah hi chuan an lungawi
ṭhin bikin ka ring lo," tiin referee-ten hmasawnna tur an la neih thu sawi.
ZoFooty Statistics
Aizawl FC 2 - 1 Ramhlun North FC
AFC : Bright Middleton Mends 10', 76'
RNFC : Lalchhuanpuia 43'
MoM : Bright Middleton Mends , AFC
2 Goals 1
56% Ball Possession 44%
13 Shots 6
4 On Target 1
2 Yellow Cards 2
0 Red Cards 0
Powered By Rainbow Multibrand
Mobile Showroom
Tute nge inlan?
Aizawl FC (4-4-2): Zothanmawia; Lalhriatrenga, Lalrinzuala Khiangte, Lalramchullova Pautu, Lalramhmunmawia; Albert Zohmingmawia (F. Lalremsanga 84'), H. Lalbiakthanga (B. Zoramthara 62'), Rohmingthanga, Brandon Vanlalremdika; Bright Middleton Mends, William Lalnunfela (Eniwo Benjamin Onome 62')
Ramhlun North FC (4-2-3-1): Liansangpuia; Lalruatfela, Lalramthlamuana, C.Ramdinmawia (Lalmalsawma 73'), Lalmuanawma; Lalruatkima Dosel (Zosangliana Sailo 62'), Lalchhuanpuia; Vanlalthlamuana, Jerry F. Zonunsanga, B. Malsawmzuala (David Lalrinchhana 84'), MC Malsawmzuala