I League khel duh tan hmun a awm!

All India Football Federation chuan season thara I League khel duh tan dil theih a nih thu India rama chanchinbu langsar hoah an chhuah leh ta! AIFF hian hetiang ruahmanna hmang hian Bengaluru FC, Bharat FC leh DSK Shivajians chu I League an lo khelhtir tawh.

Bengaluru hi JSW Group ta a ni a, kum 2013 khan sum hmangin I League-a hmunruak chu an lei a, India rama professional football club changtlung ber an ni der tawh. Bharat FC hi Kalyani Group ta niin kum 2014 khan I League-ah direct entry hmang thoin an lut a, table mawngphah nichunga season an khar hnuah I League aṭang hian an inhnukdawk lehnghal a ni. Season hmasa khan DSK Shivajians chu Royal Wahingdoh, Pune FC leh Bharat FC inhnuhdawh avangin teltir an ni ve leh a, anni pawh hian table mawngphah nichungin season an khar.

AIFF chuan, "I League hmun ruak luah tura chhang huai ber club chuan 2016-17 season aṭangin I League a khel ṭan nghal ang a, league-ah an che ṭha a nih chuan Asian Football Confederation inelnaah hial an inlan theih phah dawn a ni," tiin thuchhuah an siam.

Season hmasa I League aṭanga tla Aizawl FC chuan season tharah India rama club inelna sang ber hi an hmachhawn leh theih tur thu AIFF chuan a lo puang tawh a, hemi ṭum hian Indian FA preisdent Praful Patel chuan I League khel tur zawnna advertisement hi an chhuah tur thu a lo sawi tawh bawk a ni.