ATK leh Chennaiyin inhnehtawk

Pathianni zan Indian Super League-ah Mizo tlangval Jeje Lalpek­hlua khelhna Chennaiyin FC leh Lalrindika Ralte khelh­na Atletico de Kolkata an in­tawng a, team pahnih hi 2-2 a inhnehtawkin point khat ve veah an lungawi a ṭul.

Second half-ah goal a lut chauh a, mualneitu Kolkata tan Sameehg Doutie chuan minute 59-naah goal hmahruai a khung. Champion lai tan Jayesh Rane leh Hans Mulder ten chhanglet mah se minute 86-naah Mizo rawlthar Jerry Lalrinzuala'n penalty a chawi a, ATK tan goal-a chantir turin Iain Hume-a'n harsatna a nei lo.

Mizo inlan

Chennai tan Jeje Lalpekhlua'n inkhel bul ṭan aṭanga hun tawp thleng khelmual chhungah hun a hmang a, Chennaiyin coach Marco Materazzi -a'n Indian player-ah ani aia ṭha an awm lo a tih Jeje-a'n goal khung lo mah se an si phurh sutna tura Jayesh Rane goal khung hi a siamsak niin Winning Pass of the Match lawmman nen Jeje-a'n ISL 3-a a match hmasa ber a hmang. Bethlehem rawlthar Jerry chu minute 73-naah tlan luhtir niin a tawnhriat neih tlem ala hriat niin a lang.

Atletico de Kolkata tan Ro­bert Lalthlamuana'n inkhel bul
ṭanin minute 79-na thleng khelmual chhungah hun a hmang a, inhliam damkawr Lalrindika Ralte chu minute 84-naah bench aṭanga tlan luhtir a ni thung.

Entu lam

Mipui nuai khat chuang lenna Salt Lake Stadium meuh pawh season danga mawi ṭhin Atletico de Kolkata fan-ten mipui 11500 lenna Rabindra Sarobar Stadium an luah khat zo lo! Kolkata-in Chennaiyin an mikhual lai en tur hian mipui 10976 an pungkhawm niin official lamah chuan chhin­chhiah a ni a, heng zinga inkhel entu ṭhenkhat chu second half-ah lut chauh­in free entry hmanga lut an ni!

Atletico de Kol­kata-in sta­dium te zawk an hman chhan hi FIFA Under 17 World Cup khelhna tura Salt Lake Stadium chei mek a nih vang a ni a, stadium te zawk luah chunga ticket an hralh zo thei lo hi ATK tan chuan mualphona a ni. AIFF-in kum 2018
aṭangin ISL hi India rama league sang ber ni tura siam an tum a, Kolkata club lian East Bengal leh Mohun Bagan fan-ten hei hi duh loin ATK inkhel hi a an en duh lo nia sawi a awm a, hei hi ATK inkhel entu tlem chhan lian tak pakhat a ni.

Highlanders inlan dawn

Zanin dar 7:00-ah ISL in­khel en tur a awm lehnghal dawn a, Lal­lianzuala Chhangte, Jerry Mawi­hmingthanga leh Lalrempuia Fanai-te khelhna NorthEast United chuan Zico enkawl FC Goa an mikhual ang. Nizan khan FC Pune City leh Mumbai City an inhmachhawn a, he thuziah lai hian an result kan hre hman lo.

Mimal Lawmman

Fittest Player of the Match Sameehg Doutie, ATK

Winning Pass of the Match Jeje Lalpekhlua, Chennaiyin

Swift Moment of the Match Helder Postiga, ATK

Emerging Player of the Match Jayesh Rane, Chennaiyin

Hero of the Match Mehrajuddin Wadoo, Chennaiyin