Spurs lakah Pep leh City tlawm
Tottenham Hotspurs-in Pathianni zan khan Pep Guardiola hnuaia Premier League match zawng zawnga chak vek record titawpin Manchester City chu 2-0 in an hneh a, Mauricio Pochettino kaihhruai Spurs erawhin tun season league-ah hneh loh an la tawng lo.
White Hart Lane-ah ṭan
aṭanga minute 9-na lekah vei lam
aṭanga Danny Rose-a cross chu City defender Aleksandar Kolarov-a'n an lamah a tilut a, minute 37-naah Son Heung-min pass chu Dele Alli-a'n a khung leh bawk. Spurs hian hun chanve hma lama goal hnih an khung avangin second half-ah Erik Lamela-a'n penalty hlah mah se City an tho chhuak thei lo.
City forward Sergio Aguero-a'n ṭum hnih Spurs keeper Hugo Lloris tan buaina a siam a, hei erawh inkhel hmuhnawmna belhchhahtu mai niin Mauricio Pochettino hoten an phu ang ngeiin point thum an hlawh chhuak. Tottenham-in vawi sarih khelhah point 17 hmuin Pep-a hote point khat chiahin an pha lo.
Poch-a Game Plan
Pep Guardiola-a'n thla tam pawh a enkawl hmaa City player-te'n a duh dana an khel chhuak thei chu mak a tih thu a lo sawi tawh a, amaherawhchu Spanish manager hian hun a la ngah tawk loh miau avangin Jose Mourinho (Manchester United) leh Antonio Conte (Chelsea) te ang thoin harsatna a tawk tho tura ngaih a ni hrim hrim. Champions League-a Celtic an draw hnuah Spurs lakah harsatna an tawk a, an buai lai taka international match a awm avangin an lawm ang.
Hetihlai hian Mauricio Pochet-tino erawh tun season hi Tottenham kum thum a enkawlna chiah a ni a, season liam ta pawh khan pathumna ni mah se Leicester City elpha ber an ni. Football lam hrechiangte chuan tun season-ah Pochettino-a'n player lei belh a mamawh lo an ti nachungin Argentine manager hian midfielder pathum Victor Wanyama, Georges-Kévin N'Koudou leh Moussa Sissoko bakah forward Vincent Janssen te lalut turin pound maktaduai 70 bawr vel a seng tho.
Argentine manager Poch hi a thiltihah a chiang a, City an hneh
ṭumin a player tharte hi khelmualah an inlan vek. A bik takin Southampton a enkawl laia Celtic aṭanga a lakluh Wanyama a ṭangkai zual. Pep-a'n a naute khelh dan tura a duh ang thoin Poch-a'n a player-te a khelhtir a, ṭan phat aṭangin City keeper Claudio Bravo leh defender-te ball pass tur thlengin pressure an pe a, an tumah an hlawhtling bawk avangin Spurs hi Pathianni zan bikah chuan team ṭha zawk an ni.
De Bruyne-a tel lohna
City thiampuipa Sergio Aguero khel mah se game kaihruaitu ber Kevin de Bruyne awm loh a lang. Pep Guardiola-a'n Spurs lakah tharum ngah ngai pawimawhin Ilkay Gundogan aiah Fernando chu inkhel bul ṭantu atan a hmang a, Brazilian midfielder hian thiamna sang tak a neih bik loh avang leh Spurs player-te'n an khingpuite tibuai tura an tlan tam si avangin Porto midfielder hlui hi a talbuai tih phat rual a ni lo.
Spurs erawh an player pawi-mawh Harry Kane tel lo mah se tarlan tawh angin tun season-ah squad tihchhah nan sum an seng a, an buai phah lo. Season hmasa lama an lak tawh Son Heung-min chu Kane tel lo tih hriat lek lohin goal hmaah a hriam a, South Korean forward hian Premier League match hnuhnung pasarihah goal ruk khungin assist vawi hnih a nei tawh.
Eng nge an sawi?
Manchester City manager Pep Guardolia chuan, "Kawng tinrengah kan tlai chiah chiah zel a, hei vang hian chance pawh kan insiam tam thei lo. Tehna hrang hrang aṭanga lakin keini aiin chetṭhatna an ngah zawk," tiin an khel chhe zawk tih a pawm thlap.
City hian tun season-ah a vawi khatna atan goal an chhuah hmasa zawk a, an tho chhuak thei lo. Hei chauh hi a ni lo, City hian an club Premier League history-ah first half hmaa goal hnih emaw a aia tam an chhuah chuan point thum an hlawh chhuak ngai lo.
Spanish manager chuan sawi chhunzawmin, "October thla chauh a la ni a, tuna kan team hnathawh thlir hian a lungawi thlak. Chutihrualin tun aia ṭhaa khelh kan duh avangin tun aia nasa a kan thawh a ṭul a ni. Chak lo nei lo tawp turah hian ka indah lo hrim hrim a, chak loh chang chu a awm ve tur a ni," tiin chak loh vanga a buai phah loh thu a sawi.
Tottenham boss Mauricio Pochettino chuan, "Game plan kan nei a, a hlawhtlin chuan a lawmawm. Kan khingpui kha City an nih miau avangin khelh a harsa a, kan result-ah kan lawm em em a ni. Tuna kan hna pawimawh chu international match zawha ṭha taka khelh chhunzawm a ni," tiin a sawi a, table an awmna erawh khelh tur a la tam avangin inchhuanna tur a awm loh thu a sawi.