Parc des Princes-ah Emery hote lenglut dawn

UEFA Champions League quarterfinal-ah Paris Saint-Germain-in zanin dar 12:30 hian an manager hlui Unai Emery kaihhruai Aston Villa an mikhual dawn. Luis Enrique kaihhruai PSG hian last 16-ah Premier League champion mai tur Liverpool an hneh avangin Aston Villa lakah an buk a rit hle.

PSG hian Champions League-a champion duhin ṭum khatah player ṭha bik pathum Leo Messi, Neymar leh Kylian Mbappe te an nei rual vek a, Europe-ah result chhuan tur an nei lo. Luis Enrique-a'n Paris-a thuneihna a chelh hnuah player langsar fal an awm tawh lo a, result erawh an nei ṭha zawk.

Ligue 1 club Reims capain Yunis Abdelhamid chuan, "Messi, Neymar leh Mbappe te hunah kha chuan tlarhnung aṭanga ball lak chhuah kha a awlsam, a chhan chu tlarhma pathum khan goal venhim hna an thawk lo," tiin a sawi a, hei hian Christophe Galtier kaihruai PSG team ṭhat tawk loh chhan chu a sawifiah mai awm e.

Tun season-ah PSG-in match ruk khelh tur la awm chungin a vawi 13 nan Ligue 1-ah an champion der tawh a, Enrique hnuaiah an ṭha fal hle. PSG hian tun season league match-ah tlawm an la nei lo a, match 23 chakin vawi nga an inhnehtawk.

Enrique hote hian league an thunun avangin an inringtawk dawn a, Liverpool an hneh tawh avangin Aston Villa lakah a huai zawk zawn ni dawn. PSG-in football mawi bik an khel a, goal khung turin Ousmane Dembele, Khvicha Kvaratskhelia, Bradley Barcola leh Goncalo Ramos te an nei a, Villa tlarhnung tan dan a harsa dawn.

Midfield-ah Vitinha leh Fabian Ruiz ten ro an rel a, kum 19 mi Warren Zaire-Emery pawh a rintlak ta hle. Chutihrualin Villa an hmachhawn hunah Marquinhos an chhawr thei dawn lo a, hei hi channa nasa tak a ni thei ang.

Aston Villa hi inelna ṭan hmain quarterfinal lut tur chinah ngaih an ni lo a, mahse January transfer an hman ṭhat avangin season tir aiin an ṭha tawh zawk. Unai Emery-a'n Europe inelna a hrechiang a, PSG tan zuam ngawt a rem dawn lo.

Villa hian kartawp khan season hmang ṭha tak Nottingham Forest 2-1 in an hneh a, hei hian inrintawkna an pe dawn. Forest lakah hian January thlaa an lakluh Donyell Malen-a'n goal a khung a, Dutch forward hian Borussia Dortmund tana a khelh laiin 2023-24 season khan Champions League final a khel tawh.

Malen ai mahin January transfer-a an lakluh Marco Asensio leh Marcus Rashford te hming a langsar zawk a, Unai Emery-a'n tlarhmaa lamah duh thlan tur player a nei. Kum 22 mi Morgan Rogers hming lam hmaih a thiang lo a, Man City academy chhuak midfielder hi inkhel thlak danglam theitu a ni. Chutihrualin Villa hi team nem zawk an nih avangin Paris-a result ṭha nei turin goalkeeper Emi Martinez-a a pawimawh ang.